Kryetari i Aleancës Kosova e Re, Behgjet Pacolli e ka ngushëlluar ish-presidentin Hashim Thaçin për vdekjen e babait të tij, Haxhiut. Ai e ka quajtur njëherësh padrejtësi të madhe që Thaçit nuk i është dhënë leja për të marrë pjesë në varrimin e babait.

“Në këto momente të rënda, mendimet dhe lutjet tona janë me ju dhe familjen tuaj. Me trishtim dhe zhgënjim të thellë mora lajmin se ju nuk do të mund të merrni pjesë në varrimin e tij. Kjo është një padrejtësi e madhe, një dhimbje e dyfishtë që asnjë njeri nuk duhet ta përjetojë. Përtej ligjeve dhe rregullave, ka parime të drejtësisë, të humanizmit dhe të dinjitetit njerëzor, të cilat sot janë shkelur në mënyrën më të rëndë”.”, ka shkruar Pacolli.

Pacolli në letrën drejtuar Thaçit ka shkruar se “ky gjyq, qe me veprimet e veta e benë të pakuptimtë nuk mund të shuajë të vërtetën dhe nuk mund të ndalë rrjedhën e historisë”.

Sipas Pacollit, e vërteta do të triumfojë dhe ju do të dilni më i fortë se kurrë

“Por, ju keni përballuar sfida të panumërta me qëndresë dhe forcë, nga lufta për liri e deri te ndërtimi i shtetit. Ju keni qenë gjithmonë një udhëheqës i guximshëm, krenar për rrugën që keni ndjekur dhe për sakrificat që keni bërë për popullin dhe shtetin e Kosovës. Unë e kam parë me sytë e mi se si keni punuar me vendosmëri për shpalljen e pavarësisë dhe për ndërtimin e institucioneve të një shteti të lirë e sovran”.