Ministri i Punëve të Jashtme, Behgjet Pacolli, e ka komentuar arrestimin e gjashtë shtetasve turk nga Policia e Kosovës.

Ai ka thënë se është njoftuar shumë vonë për këtë aksion, tek pasi ai ka përfunduar.

Në “Tv Dukagjini”, ai ka deklaruar se urdhërin për arrestimin e tyre e ka dhënë shefi i AKI-së, Driton Gashi.

Pacolli e lavdëroi ministrin e Punëve të Brendshme, Flamur Sefaj, i cili e kishte mbajtur të fshehur informatën për arrestimin e tyre.

“Të marrim pak kohë deri nesër, ku presim që të kemi një epilog. E vlerësoi shumë që as mu nuk më ka njoftu për këtë aksion. AKI-ja është përgjegjëse sepse është këshilltar kryesor i presidentit dhe kryeministrit. Ai është një djalë  i meqëm. Sot e kom dëgjuar tregimin e tij cka ka ndodhë. Sipas ligjit de jure nuk mund t’i thuhet në asnjë aspekt që ka gabu dicka. Këso lloj dëbimesh kanë ndodhur shumë herë në Gjermani dhe vendet tjera të Perëndimit”, ka thënë Pacolli.

Pacolli ka folur edhe për mos informimin e krerëve të shtetit rreth deportimit të gjashtë gylenistëve nga Kosova.

Ai shtoi se Agjencia e Inteligjencës ka të drejtë të marrë këso lloj veprimesh pa lajmëruar presidentin apo kryeministrin.

Pacolli mohoi të ketë marrur ndonjë kërkesë nga ana e zyrtarëve të Turqisë, për ekstradimin e ndonjë personi që ka lidhje me Fetullah Gylen.

“Asnjëherë ne si ministri i Punëve të Jashtme, nuk kemi marrur ndonjë kërkesë që ka të bëjë me ekstradimin e ndonjë shtetasi turk”, ka thënë Pacolli.