Zëvendëskryeministri dhe ministror i Punëve të Jashtme, Behgjet Pacolli, me ftesë të presidentit të Maqedonisë, Gjorgje Ivanov, po merr pjesë në punimet e procesit të Bërdo – Brione.

Gjatë qëndrimit të tij në punimet e këtij procesi ministri Pacolli po diskuton me ministrat e punëve të jashtme të vendeve pjesëmarrëse për zhvillimet në rajon, rrugën në procesin e integrimeve evropiane si dhe për zhvillimet e gjithëmbarshme ndërkombëtare.

Numri dy i Qeverisë së Kosovës, Pacolli gjatë diskutimeve me homologët e tij nga rajoni ka theksuar përkushtimin e institucioneve të Republikës së Kosovës për të vazhduar në rrugën e integrimeve evropiane, sidomos tani, pas qartësimit të procesit të integrimeve, që nga publikimi i Strategjisë së re të zgjerimit nga Komisioni Evropian.

Kryediplomati kosovar, ka ritheksuar angazhimin e institucioneve të Kosovës për të kontribuar në zhvillimin e fqinjësisë së mirë.

Në punimet e procesit të Bërdo – Brione të organizuar nga Republika e Maqedonisë në cilësinë e presidencës së radhës, përveç presidentëve dhe ministrave të punëve të jashtme të rajonit po merr pjese edhe presidenti i Këshillit të Evropës, Donald Tusk.

Procesi i Bërdo-s u iniciua zyrtarisht nga takimi i liderëve të Ballkanit Perëndimor në Bërdo afër Kranjit më 20 mars 2010. Si një nismë rajonale joformale, procesi mori emrin “Procesi i Bërdo-s”, sipas vendit të mbajtjes.

Qëllimi i krijimit të kësaj nisme rajonale ishte forcimi i lidhjeve në rajonin e Ballkanit Perëndimor, në mënyrë që bashkëpunimi i forcuar në rajon të ndihmojë progresin e saj më të shpejtë drejt integrimit evropian.

/Epoka e re/