Kryetari i Aleancës Kosova e Re (AKR), Behgjet Pacolli, ka bërë një deklaratë falënderimi në “Facebook” për qytetarët e Kosovës që kanë marrë pjesë në zgjedhjet e 9 shkurtit.

Në veçanti, ai ka falënderuar ata që i dhanë mbështetje koalicionit për familjen (bashkim i dy subjekteve politike Aleanca Kosova e Re (AKR), Partia e Drejtësisë dhe Iniciativës Qytetare”.

Pacolli ka shprehur keqardhje që humbën një mundësi të rëndësishme për t’i dalë në mbështetje familjes, dinjitetit dhe traditës.

Megjithatë, ai ka thënë se beson fuqishëm se ky koalicion në të ardhmen duhet të vazhdojë të punojë me më shumë përkushtim, sepse familja jonë tradicionale meriton të mbrohet dhe të fuqizohet çdo ditë e më shumë.

“Deklaratë falënderimi! Si mbështetës dhe pjesë i ‘Koalicionit për Familje’ dua të falënderoj të gjithë qytetarët e Republikës së Kosovës që morën pjesë në këto zgjedhje, duke dëshmuar dinjitet, urtësi dhe qytetërim. Në veçanti, falënderoj të gjithë ata që, me votën e tyre, i dhanë mbështetje koalicionit tonë. Gjithashtu, shpreh mirënjohje të thellë për partnerët tanë të koalicionit, aktivistët që bënë të mundur zhvillimin e një fushate dinjitoze, si dhe kandidatët për deputetë që garuan me përkushtim. Ju keni dhënë gjithçka që ka qenë në dorën tuaj! Nga ana tjetër, më vjen keq që humbëm një mundësi të rëndësishme për t’i dalë në mbështetje familjes, dinjitetit dhe traditës sonë – vlera këto që mbrohen edhe nga shoqëritë më demokratike në botë. Besoj fuqishëm se ky koalicion në të ardhmen duhet të vazhdojë të punojë me më shumë përkushtim, sepse familja jonë tradicionale meriton të mbrohet dhe të fuqizohet çdo ditë e më shumë”, ka shkruar Pacolli.