Shkruan Arben Dashevci, njohës te çështjeve të sigurisë

Ne jemi dëshmitar për faktin se punët që përfshijnë ekspozim të vazhdueshëm ndaj rrezikut duhet të kenë trajtim më të drejtë dhe paga më të larta. Policia e Kosovës është përballur dhe vazhdon të përballet me rrezik, por nuk kompensohet në mënyrë adekuate për rreziqet që hasin në punë.

Nuk duhet të ketë debat apo hezitim kur është fjala për sigurimin e pagesës së rrezikut për Policinë e Kosovës. Ngjarjet që kanë ndodhur në Kosovë, duke përfshirë konfrontimet me grupet subversive dhe sulmet terroriste, kanë rrezikuar sigurinë e kombit, kanë shkelur parimet kushtetuese dhe kanë prishur rendin dhe ligjin. Këta terroristë kanë marrë edhe jetën e një rreshteri të policisë në Kosovë.

Ata janë përpjekur të çmontojnë gjithçka që ne kemi ndërtuar me mundim me punë dhe sakrifica. Prandaj, është e drejtë që ata të marrin kompensimin e duhur për detyrat e tyre zyrtare në mbrojtjen e ligjit dhe rendit të të gjithë qytetarëve, pavarësisht nga përkatësia etnike, ngjyra, kombësia apo raca e tyre.

Nuk mund të harrojmë ngjarjet e marsit 2020 kur bota u godit nga shpallja e pandemisë Covid-19. Ky virus na mbylli brenda katër mureve të shtëpive tona dhe morri jetëra të panumërta njerëzish në mbarë botën.

E gjithë bota u mobilizua dhe vendi ynë nuk ishte përjashtim. Mjekët, infermierët, teknikët mjekësorë dhe profesionistë të tjerë të kujdesit shëndetësor u bënë heronjtë e vijës së parë që shpëtuan jetë. Përkushtimi dhe guximi i tyre meritojnë jo vetëm pagesë shtesë, por edhe njohje të rreziqeve me të cilat u përballën në punë, të cilat ishin jetike për moralin e tyre.

Prandaj, është thelbësore të theksohet edhe nevoja urgjente për sigurim shëndetësor për Policinë e Kosovës. Ata rregullisht  merren me grupe të ndryshme subversive, kriminelë dhe terroristë.

Le të shtjellojmë shkurtimisht  këtë çështje.

Ne përballemi me një problem të drejtpërdrejtë me Serbinë dhe strukturat e saj ilegale në Kosovë, veçanërisht në rajonin verior. Disa nga këto grupe janë shpallur terroriste, si Mbrojtja Civile dhe Brigada e Veriut. Çdo sulm që ata kryejnë është një përpjekje për të destabilizuar kombin tonë, që përbën një sulm të drejtpërdrejtë dhe publik. Ata manifestohen edhe nëpërmjet aktiviteteve kriminale, duke përhapur parulla fashiste nëpër  terrenet sportive në mbarë botën. Këto grupe janë të lidhura drejtpërdrejt me qeverinë serbe dhe haptazi kërcënojnë rendin kushtetues dhe sigurinë e Republikës së Kosovës.

Ata kurrë nuk do ta rimarrin kontrollin mbi Kosovën, qoftë me apo pa përdorimin e forcës. Ata kanë dështuar në të kaluarën, kanë dështuar më 24 shtator dhe do të vazhdojnë të dështojnë. Sulmi terrorist i orkestruar nga grupi diversant nga Serbia është koordinuar drejtpërdrejt nga qeveria dhe ushtria serbe, i mbështetur me prova të pamohueshme. Ata u zhdukën dhe u tërhoqën përsëri në Serbi, ku vazhdojnë të marrin urdhra direkt nga autoritetet serbe. Ky është një model i përsëritur sa herë që diskutohet për Kosovën në forume apo dialogje ndërkombëtare.

Ata mund ta portretizojnë veten si viktima, por realiteti është larg tij.

Problemi kryesor qëndron në rajonin verior të Kosovës, i cili vazhdon të jetë temë diskutimi deri në arritjen e njohjes reciproke. Serbia shfrytëzon çdo mundësi dhe dobësi nga ana jonë, me të vetmin synim aneksimin e Veriut. Megjithatë, ata duket se harrojnë se ne jemi një shtet sovran dhe aneksimi nuk është një opsion.

Ne kemi qenë dëshmitarë të ngjarjeve të 29 majit 2023 dhe 24 shtatorit 2023, së bashku me pasojat që pasuan. Anëtarët e KFOR-it u plagosën, disa madje humbën gjymtyrët. Media jonë u sulmua edhe më 29 maj 2023, pasi kriminelët tentuan të fshehin veprimet e tyre, por dështuan.

Pavarësisht rreziqeve, gazetarët dhe kameramanët tanë mbetën profesionistë dhe të palëkundur. Ata u treguan kriminelëve dhe grupeve të caktuara se nuk ka kthim mbrapa dhe e vërteta u ekspozua para botës demokratike.

Nga ana tjetër, Serbia që në fillim i shfrytëzon mediat propagandistike, duke i përdorur ato për të sulmuar popullatën serbe në Kosovë. Ata manipulojnë opinionet me trillime dhe nxisin urrejtje ndëretnike në popullin serb. Kjo është një luftë speciale që Serbia po e bën kundër Republikës së Kosovës.

Sa herë që mbahet një mbledhje apo seancë e KS të OKB-së, ku diskutohet për shtetin e Kosovës, gjithmonë duket se diçka ndodh apo përgatitet paraprakisht. Kjo skemë e përsëritur dhe e parashikueshme synon t’i sigurojë Serbisë materiale propagandistike.

Mirëpo, Serbia dështoi më 24 shtator. Kjo është makina propagandistike serbe në punë, një taktikë të cilën e kanë përdorur edhe më parë, duke rezultuar në humbjen e shumë jetëve.

Ata e maksimizojnë përdorimin e propagandës dhe viktimizimit, së bashku me përpjekjet për sabotim dhe destabilizimin e plotë. Ata marrin mbështetje nga Rusia, me bazën e tyre famëkeqe në Rashkë dhe Nish që funksionon 24/7. Ata janë të përgatitur të bëjnë çdo gjë që na dëmton seriozisht si shtet, duke përfshirë sulmet kibernetike, sulmet terroriste dhe forma të ndryshme sabotimi.

Organet tona të sigurisë nuk janë boshe; po punojnë pa u lodhur për të mbuluar çdo boshllëk dhe për të ruajtur vigjilencën maksimale. Agjencitë tona të sigurisë janë plotësisht të vetëdijshme për qëllimin keqdashës të Serbisë dhe ne nuk do të tërhiqemi si shtet.

Duke ecur përpara, duhet të tregojmë kujdes dhe profesionalizëm përsa i përket sigurisë. Sukseset tona janë evidente, por duhet të jemi edhe më vigjilentë se kurrë më parë.

Nuk ka luftë dhe nuk do të ketë më. Epoka e Millosheviqit dhe pasuesve të tij, si Radoiçiq, Daçiq, Vulin dhe Vuçiq, ka përfunduar. Vitet e ’90-ta kanë kaluar dhe nuk do të kthehen më. Politika dhe organet tona të sigurisë kanë bërë punën e tyre, duke punuar në koordinim me aleatët ndërkombëtarë nga BE dhe SHBA.

Interesat e Kosovës mund të mbrohen vetëm me mbështetjen e aleatëve tanë. Në këtë moment vendimtar, uniteti është thelbësor dhe nuk duhet të ketë ndarje. Ne jemi më të fortë se kurrë më parë në çdo aspekt dhe Serbia e di mirë këtë.

Synimi ynë është paqja dhe anëtarësimi në BE dhe NATO. Ne jemi në zemër të Evropës dhe e meritojmë anëtarësimin si çdo komb tjetër evropian.

Si përfundim, ne po mbrohemi dhe asnjëherë nuk kemi iniciuar agresion në historinë tonë. Kapacitetet tona janë mbrojtëse dhe ne i mbrojmë të gjithë qytetarët e Kosovës pa dallim. Sovraniteti dhe integriteti territorial i vendit tonë janë të mbrojtura, të garantuara me konventa ndërkombëtare të vlefshme.

Vigjilenca është alternativa jonë e vetme dhe ne duhet të qëndrojmë të palëkundur në angazhimin tonë për të mbrojtur kombin tonë.