Protestuesit pakistanezë, të cilët janë të zemëruar pas dhunimit dhe vrasjes së vajzës tetë vjeçare, Zainab Ansari, kanë sulmuar stacionin policor dhe një zyrë qeveritare, e cila ka rezultuar me vdekjen e të paktën dy personave.

Zyrtari i lartë policor, Imran Naëaz Khan, i ka thënë Radios Evropa e Lirë, se sulmi në stacionin policor ka ndodhur në Provincën Punjab.

Një zyrtar tjetër ka refuzuar të deklarojë nëse vdekjet kanë qenë rezultat i të shtënave nga policia.

Dhuna ka shpërthyer disa orë para ceremonisë së funeralit të vajzës, Zainab Ansari, trupi i së cilës është gjetur në një kosh mbeturinash.

Banorët lokalë kanë thënë se tetë vjeçarja është zhdukur, pasi ka ndjekur mësimet kuranike më 4 janar.

“Dua drejtësi! Dua drejtësi!” ka thënë nëna e vajzës.

“Në dy vitet e fundit ne jemi duke jetuar në frikë. Prindërit janë të frikësuar të lejojnë fëmijët të dalin jashtë shtëpisë”, ka thënë babai i vajzës.

Naëaz Khan ka thënë se një i dyshuar është arrestuar.

Ai ka shtuar se janë ndaluar edhe 57 persona të tjerë, mirëpo janë liruar “pasi nuk është përputhur ADN-ja”.

Lideri opozitar, Imran Khan, u ka bërë thirrje autoriteteve të veprojnë me shpejtësi, duke dënuar me anë të një postimi në Twitter “dhunimin e tmerrshëm të vajzës duke vënë në pah edhe një herë sa të ndjeshëm janë fëmijët”.