Në vitin 2015, kur ishte e pabesueshme për shumëkënd, Bill Gates parashikoi ardhjen e një pandemie që do të shkaktonte më shumë viktima se një luftë. Gjatë një interviste me Jimmy Fallon, babai i Microsoft-it paraqet tani një skenar që duket po aq i pamundur për ne, por pas dhjetë vitesh mund të na befasojë më pak. Nga viti 2035, java e punës do të reduktohet në dy ditë, maksimumi tre ditë pune, pasi inteligjenca artificiale do të bëjë që njerëzit të mos jenë më të nevojshëm për shumicën e gjërave. Huffington Post e analizoi këtë profeci me disa ekspertë të punës dhe inteligjencës artificiale për të kuptuar se sa mundësi ka që Gates të ketë të drejtë dhe çfarë pasojash do të kishte ky sistem i ri punësimi.

Sipas Massimo Canducci, menaxher i inovacionit, teknolog dhe profesor i Menaxhimit të Inovacionit në Universitetet e Torinos dhe Pavisë, ky skenar është padyshim i mundshëm, por me disa nuanca të rëndësishme. Inteligjenca artificiale po ecën me ritme të papritura, duke përmirësuar aftësinë e saj për të automatizuar procese komplekse. Megjithatë, transformimi nuk do të jetë i njëjtë për të gjithë sektorët: “Është e arsyeshme të parashikohet një reduktim i orëve të punës në shumë fusha profesionale, por do të kemi disa sektorë që do të jenë më të ekspozuar dhe të tjerë që do të mbeten në gjendje të pandryshuar”, thotë ai për HuffPost.

Reduktimi i javës së punës dhe roli i shtetit

Qeveritë do të kenë një rol kyç në menaxhimin e kësaj situate, thotë Canducci: “Prioritetet duhet të përfshijnë investime në trajnime të vazhdueshme dhe ripunësim, rishikimin e sistemeve të mirëqenies, shqyrtimin e modeleve inovative si të ardhurat bazë universale, politika fiskale të përditësuara për të siguruar që përfitimet ekonomike të automatizimit të shpërndahen në mënyrë të barabartë”. Po ashtu, shteti do të duhet të sigurojë që punonjësit të fitojnë aftësitë e nevojshme për të mos mbetur jashtë tregut të punës.

Çështjet psikologjike dhe ndikimi në shëndetin mendor

Një revolucion i tillë i rutinës së njerëzve do të kishte edhe një ndikim psikologjik. Sipas psikologut të punës, Sergio Sangiorgi, “Nuk ka rëndësi vetëm sasia, por edhe cilësia e orëve të dedikuara për punë dhe për privatësinë”. Ndryshimet mund të jenë pozitive, si rritja e produktivitetit dhe liria nga punët monotone, por gjithashtu ka rreziqe, si papunësia teknologjike dhe polarizimi i tregut të punës.

Ky skenar mund të sjellë një ulje të konsumimit profesionale dhe një përmirësim të balancës mes jetës dhe punës, por kjo do të varet nga mënyra se si shoqëria do të përshtatet me këto ndryshime.