“Prishtina Weather” ka njoftuar për motin që do të mbajë gjatë javës së ardhshme në Kosovë.

Mot jostabil parashihet për javën e tretë të janarit.  Shtrirjet e masave të ngrohta ajrore do të sjellin kushte edhe për rritje të temperaturave, deri në 11 – 12 celsius ditën e enjte, ndërkohë që të martën dhe në fundjavë depërtimet e fronteve të ftohta sjellin kushte edhe për të reshura bore, me rënie të temperaturave maksimale edhe pranë  o gradë celsius.

“ Minimalet zbresin deri në -5C e -7C mëngjesin e së mërkurës, derisa të enjten e të premten shënojnë rritje deri në 2C e 4C. Moti i paqëndrueshëm sjell kushte edhe për qarkullim më të mirë ajror, që edhe pritet të mbajë ndotësit ajror më të shpërndarë.  Gjatë ditës indeksi i cilësisë së ajrit do të jetë në vlera të pranueshme dhe të mira, e vetëm orëve të mbrëmjes, në kushte qetësie, nivelet e ndotjes kalojnë në vlera të dobëta dhe shumë të dobëta”, ka njoftuar “Prishtina Weather”.

Parashikimi i motit për pesë ditët e ardhshme:

15.01 – Kryesisht me vranësira.  Pasdite më vonë dhe në mbrëmje vende-vende priten edhe reshje shiu, ndërsa në vise malore reshje dëbore.

16.01 – Orëve të hershme të mëngjesit reshjet e dëborës shtrihen edhe përgjatë ultësirave.  Deri në mesditë reshjet pushojnë, e pasdite nuk mungojnë edhe intervale me diell.

17.01 – Kryesisht me vranësira.  Intervale të shkurta me diell pasdite.

18.01 – Më butë, me vranësira të ndryshueshme dhe intervale me diell.  Në perëndim të vendit priten edhe reshje lokale shiu.

19.01 – Fillimisht mot i butë.  Me shtrirjen e një fronti të ftohtë deri në mbrëmje priten edhe të reshura bore dhe rënie e temperaturave. Pritet të frynë erëra më të fuqishme, si nga jugu por edhe verilindja me hove edhe mbi 15m/s, ditën e martë.

Shtypja atmosferike fillimisht zbret thellë nën vlera normale, e më pas shënon rritje deri nga mesi i javës, kur pëson rënie sërish ditën e enjte.