Parlamenti i Armenisë ka votuar të martën për t’iu bashkuar Gjykatës Penale Ndërkombëtare, duke e detyruar ish-republikën sovjetike të arrestojë presidentin rus, Vladimir Putin, nëse ai do të vizitonte vendin.

Vendimi do të tensionojë edhe më tutje marrëdhëniet me Moskën, aleatin tradicional të Armenisë, raporton “The Guardian”.

Marrëdhëniet tashmë janë dëmtuar rëndë për shkak të pushtimit të Ukrainës nga Kremlini dhe rimarrjes së Nagorno-Karabakut nga Azerbajxhani.

Kremlini ka paralajmëruar Armeninë javën e kaluar se vendimi i saj për t’iu bashkuar Gjykatës Penale Ndërkombëtare, e cila ka lëshuar një urdhër-arresti për Putinin për mbikëqyrjen e rrëmbimit të fëmijëve ukrainas, ishte “jashtëzakonisht armiqësor”.

Armenia është përpjekur të qetësojë Rusinë se po trajton vetëm ato që thotë se janë krime lufte të kryera nga Azerbajxhani në konfliktin afatgjatë me fqinjin e saj dhe nuk po synon Moskën.