Deputetja e Aleancës për Ardhmërinë e Kosovës (AAK), Albena Reshitaj, ka thënë se AAK-ja tashmë është përgatitur për zgjedhje.

Megjithatë, ajo tha se Ramush Haradinaj do të jetë kandidat për president të Kosovës.

“Aleanca për Ardhmërinë e Kosovës tashmë është përgatitur për zgjedhje. Ndonëse jemi në një situatë jo edhe të këndshme, mirëpo gjithmonë ajo që kërkohet nevoja dhe dëshira e popullit është për tu respektuar. Aleanca për Ardhmërinë e Kosovës është duke bërë organizimet e fundit për të filluar një procedurë të re zgjedhore”.

“Në takimet dhe mbledhjet e Kryesisë po diskutohet se kush do të jetë bartës i listës, por ende nuk është marrë një vendim definitiv. Po gjithsesi ne si aleancë të gjithë ata që besojnë në Haradinaj besojmë që ai do të jetë kandidat për president të Kosovës. Unë mendoj që i gjithë populli i Kosovës në këto momente ka nevojë për një president i cili është i gatshëm të ballafaqohet me situata shumë të rënda të cilat është duke u ballafaquar vendi ynë”.

Poashtu, deputetja Reshitaj shtoi se koalicionet parazgjedhore nuk kanë dhënë ndonjë efekt të kënaqshëm, duke shtuar se ato janë të mundshme pas zgjedhjeve, raporton EO.

“Ende nuk është bërë lista për deputet. AAK-ja ka mjaft kandidatë potencial për të qenë pjesë e listës së kandidatëve. Do të ketë personalitete nga të gjitha fushat. Koalicionet parazgjedhore nuk kanë dhënë ndonjë efekt të kënaqshëm në zgjedhje. Unë do të doja që çdo parti politike të matet vetë para qytetarëve të Kosovës”.

“Në momentin që je një organizatë e veçantë krijon një ideologji të veçantë, mendojë që do të duhesh të matesh vetë në zgjedhje. Por pas zgjedhjeve normalisht koalicionet janë të mundshme. Dhe unë dua të besoj që qytetarët e vendit janë të interesuar të kenë institucione stabile dhe politikëbërje stabile për vendin. Jemi duke u përgatitur për zgjedhje që të dalim faqebardhë dhe fitues”, shtoi Reshitaj.