Pas PDK-së dhe AAK-së edhe Nisma Socialdemokrate ka reaguar ndaj deklaratës së ministrit të Integrimeve, Blerim Rekës, se Kosova mund të bëjë një kompromis me Serbinë për t’i lejuar çasje në Adriatik.

Blerim Raka në një emision televiziv ka thënë se në kuadër të marrëveshjes finale me Serbinë, asaj mund t’i jepet korridori transit për dalje në detin Adriatik përmes Kosovës.

Anëtari i Kryesisë së Nismës Socialdemokrate, Fazli Hoxha, përmes një postimi në llogarinë e vet në “Facebook”, ka pyetur kryeministrin Albin Kurti nëse është në dijeni për deklaratën që ka dhënë ministri i tij.

Hoxha ka kërkuar nga Kurti që të marrë masa ndaj ministrit Reka.

“Albin urgjentisht duhesh të distancohesh nga kjo deklaratë sepse je kryeministër dhe duhet të merren masa ndaj z. Reka.

Deklaratat e tilla janë të rrëzikshme, sepse  cenojnë sovranitetin e Republikës së Kosovës”, ka shkruar Hoxha.

Ai ka thënë se as LDK-ja nuk mund të heshtë ndaj kësaj deklarate të ministrit Reka.

Postimi i plotë i Fazli Hoxhës:

Albin a je në dijeni për deklaratën që ka dhënë ministri i juaj për Integrim Evropian, Blerim Reka për marrëveshjen Kosovë-Serbi, ku thotë kështu: “Unë kam një ofertë tjetër. Ne mund t’ia japim korridorin transit Serbisë për dalje në detin Adriatik, përmes Kosovës, përmes autostradës së Kosovës, në Durrës”.

Albin urgjentisht duhesh të distancohesh nga kjo deklaratë sepse je kryeministër dhe duhet të merren masa ndaj z. Reka.

Deklaratat e tilla janë të rrëzikshme, sepse  cenojnë sovranitetin e Republikës së Kosovës.

U bën veç një muaj që kur ke ardhur në krye të qeverisë, plotë skandale: shkarkime, shfuqizim vendimesh nga qeveritë e mëparshme, e deklarata 100 për qind të kundërta me ato çfarë ke deklaruar sa ishe në opozitë.

Edhe LDK-së nuk i ndihmon kjo heshtje. Kolaqin e keni të përbashkët.