Ish-ministri i Shëndetësisë, Armend Zemaj, ka thënë se paaftësia e kësaj qeverie është duke dëmtuar shëndetin e qytetarëve, pasi sipas tij, vetëm në muajin janar 30 qytetarë kanë humbur jetën nga Covid-19.

“Pasojat e paaftësisë qeverisëse janë të tmerrshme në çdo aspekt. Bilanci i keqmenaxhimit të pandemisë vetëm gjatë muajit janar është si në vijim: 46 mijë të infektuar me Covid-19 dhe 30 jetë të humbura”, ka shkruar Zemaj në llogarinë e vet në “Facebook”.

Ai ka shtuar se përfundimisht, paaftësia qeverisëse dëmton shëndetin. “Dëmton ekonominë. Dëmton mirëqenien. Dëmton shtetin. I dëmton krejt pa përjashtim si dhe është e padrejtë ndaj të gjithëve”.

“Mirënjohje pafund për profesionistët shëndetësor, sepse përkundër trajtimit të keq që po iu bën kjo Qeveri e paaftë, ata po qëndrojnë fuqishëm në ballë të betejës kundër pandemisë. Qytetarë të dashur, Ju lutem që të kujdeseni maksimalisht për vete dhe më të dashurit tuaj”, ka shkruar Zemaj.