Presidenti i Bjellorusisë, Aleksandër Lukashenko, ka injoruar këshillat për të frenuar përhapjen e koronavirusit dhe ka organizuar sot një paradë ushtarake.

Parada ushtarake është organizuar për të shënuar 75-vjetorin e fitores në Luftën e Dytë Botërore.

Ushtarë dhe tanke marshuan në rrugët e kryeqytetit bjellorus, Minks.

Lukashenko madje ka thënë se është “psikozë” frika nga sëmundja COVID-19, që shkaktohet nga koronavirusi. Ai ka paralajmëruar se masat izoluese mund të dëmtojnë ekonominë e vendit.

Në Bjellorusi, ligat lokale të futbollit vazhdojnë të zhvillojnë ndeshje me praninë e tifozëve.

Sipas të dhënave të publikuara nga Universiteti Johns Hopkins afro 4 milionë persona janë infektuar me koronavirus, ndërkaq, 275 mijë të tjerë kanë humbur jetën.

Bjellorusia, një vend me rreth 9 milionë banorë, ka regjistruar më shumë se 21 mijë raste të infeksionit, sipas universitetit Johns Hopkins.