Partia Demokratike e Kosovës (PDK) ka insistuar që të hiqet fjalia “ndikimi i grupeve të caktuara dhe të fuqishme” tek pika e fushëveprimit të Komisionit hetimor lidhur me procesin e privatizimit në Kosovë.

Sipas tyre, kështu po dëmtohet procesi hetimor i këtij komisioni. Megjithatë me këtë nuk janë pajtuar edhe anëtarë të Lëvizjes Vetëvendosje. Sipas tyre, insistimi për heqjen e kësaj fjalie, tregon se të njëjtin mund ta kenë “mizën pas veshi”.

Gazmend Bytyçi nga Partia Demokratike e Kosovës, ka kërkuar që të mos dëmtohet puna e komisionit me paragjykime të tilla.

“Mos ta dëmtojmë punën e komisionit në këtë drejtim. Mos t’i japim qysh në start të punës tonë ngjyrimin e hetimeve të ndikimeve të grupeve të fuqishme. Ne absolut jemi në vijën e asaj që kemi kërkuar që të iniciohet ky komision parlamentar në arsyeshmërinë. Pretendojmë që kjo pjesë dëmton atë akuzën për të cilën ne kemi ngritur këtë çështje”, ka thënë ai.

Për këtë edhe anëtari i këtij komisioni nga PDK-ja, Sejdi Hoxha, ka insistuar që të hiqet termi “ndikimi i grupeve të caktuara të fuqishme”, sepse sipas tij është paragjykim i dëmshëm.

“Unë po insistoj që të hiqet termi ‘ndikimet e grupeve të caktuara dhe grupeve të fuqishme’ sepse është paragjykim dhe supozim i dëmshëm që me një mënyrë mundet me prish procesin.. as unë nuk po e di kë po e paragjykon. Kur themi ndikimi që patën grupet e fuqishme, ku po e dimë ne a kanë pasur ndikim, a nuk kanë pasur ndikim”, ka shtuar ai.

Megjithatë, Liburn Aliu nga Lëvizja Vetëvendosje ka thënë se insistimi i tillë tregon se PDK e ka “mizën pas veshi”.

“Nuk po e paragjykojmë që është dikush. Bile a po do me të thënë të drejtën Sejdi, fakti që e keni iniciuar eliminimin e kësaj fjalie, i bie sikur ti e paske ‘një mizë pas veshi’ që po do me heq. Unë e di që nuk e ke, prandaj le. Se asgjë nuk po të bën dëm. Nuk po thotë as PDK-ja, as kush tjetër. Veç fakti që po lyp të hiqet është keq, është për mu problematike kjo ‘hiqeni fjalën grup i fuqishëm sepse po mendoni që sikur ne’. Jo bre nuk po mendon askush, nuk po mendojmë hiç”, ka thënë Aliu.

Ankesa për fushëveprimin e këtij komisioni, ka pasur edhe deputeti Bekë Berisha nga Aleanca për Ardhmërinë e Kosovës. Sipas tij, duhet të ketë kujdes në formulime, meqë siç ka thënë ai, është fillimi i hetimeve.

“Mos me pas paraprakisht paragjykime po, po me i vë vulën për të orientuar hetimin diku, qysh e mbajta fjalimin që e pata në mbledhjen e kaluar thoshe ‘UÇK nuk ka marrë këtu në Ferizaj, por kanë marrë këta tjerët’. Këtu nuk duhet të orientohet e as nuk duhet me u përmend UÇK-ja. Nuk besoj që ka kush pretendime që bash me thënë privatizimi-UÇK-ja. Edhe partitë politike, nuk duhet me u përmend se lëre më UÇK-ja që thoshe ‘ushtarët e UÇK-së’. Si paragjykim, fjalët edhe rrenë edhe që jemi ardhur deri te ky komision me bo, po kanë pasur ndikim ato gjëra. Mirëpo, të kemi kujdes pajtohem me formulimin që e ka bërë nëse u kuptua drejtë ky është fillimi i hetimeve, si rezultat i hetimeve del kush ka pasur ndikim apo grupet kush kanë qenë”, ka shtuar ai.

E anëtari tjetër i këtij komisioni nga partia Vetëvendosje, Hekuran Murati, ka potencuar se patjetër duhet të ketë hetim të ndikimeve politike, sepse sipas tij bordet janë të emëruar politikisht.

“Tash, a ka dikush lidhje më shumë apo më pak, ajo mbetet me u pa. Prandaj është dashur të kërkohet nga fillimi prej AKM-së kur kanë qenë të gjitha bordet, gjitha menaxhmenti me pa se çfarë kanë bërë, çfarë kanë vepruar. Sa i përket paragjykimit, nuk është paragjykim është hetim. Nëse e dimë me saktësi që ka pasur afera e ‘Grandit’ ka ekzistuar, ajo nuk është paragjykim ajo ka të bëjë me hetim, sepse po dihet që ka ndodhur një gjë e tillë”, është shprehur ai.

Paragjykuese i ka quajtur disa formulime edhe anëtarja e komisionit, Doruntinë Maloku, ku ka kërkuar nga Agjencia e Privatizimit materiale ku tregohet se kush ka qenë kryesues, e kush anëtar bordi në periudha të caktuara. Gjatë diskutimit në këtë komision hetimor, janë bërë përmirësime në formulimin e fushëveprimtarisë së këtij komisioni./KP/