Partia Demokratike të Kosovës ka mbajtur të premten mbledhjen e radhës të Kryesisë, në të cilën është diskutuar për zhvillimet aktuale politike në vend.

Kryetari i Partisë Demokratike të Kosovës, Memli Krasniqi, ka thënë se nisur nga situata e vështirë në të cilën gjenden sot Kosova dhe qytetarët tanë, mobilizimi për t’i dhënë vendit një qeveri të re, kredibile, të aftë dhe të përgjegjshme më 9 shkurt është i domosdoshëm.

Kryetari Krasniqi i ka njoftuar anëtarët e Kryesisë me të gjitha përgatitjet që po bëhen në mobilizimin e të gjitha strukturave të partisë, brenda dhe jashtë Kosovës.

Ndërsa kandidati për kryeministër, Bedri Hamza, ka njoftuar anëtarët e Kryesisë me punën që është bërë në përpilimin e programit dhe ofertës së PDK-së për zgjedhjet e 9 shkurtit.  Hamza ka thënë se PDK-ja do ta ketë programin më të mirë dhe më profesional – pikërisht atë për të cilin kanë nevojë sot vendi dhe qytetarët.

Anëtarët e Kryesisë së Partisë Demokratike të Kosovës i kanë dhënë mbështetjen e plotë kandidatit për kryeministër, Bedri Hamza, në raport me punën dhe programin e tij qeverisës.  “Partia Demokratike e Kosovës, më 9 shkurt të vitit 2025, në zgjedhjet e reja parlamentare në vend, përmes kandidatit të saj Bedri Hamza, ofertës së tij programore dhe listës së kandidatëve për deputetë, do t’i jap vendit një qeveri të re që rikthen shtetin në rrugën e zhvillimit dhe integrimit euro-atlantik”, ka njoftuar PDK-ja.