Dega e Partisë Demokratike të Kosovës (PDK) në Prizren ka thënë se qeverisja lokale në këtë komunë, e cila udhëhiqet nga Lëvizja Vetëvendosje edhe gjatë kohës së pandemisë Covid-19 ka bërë shumë gabime.

Kryetari i kësaj dege, Shaqir Totaj, ka thënë se kanë qenë më të rezervuar në të bërit opozitë, por me qëllim të mbrojtjes së interesit publik, do të vazhdojnë denoncimin e dukurive negative.

“Kësaj radhe, do të merremi me degradimin urban dhe të ambientit, ku si dukuri negative në qytetin e Prizrenit të udhëhequr nga LV-ja dhe kryetari Haskuka nuk ka të ndalur. Një nga dukuritë negative që është në rritje e sipër, është edhe ndërtimi i të ashtuquajturave villa, të cilat tashmë janë ndërtuar në shumë lokacione në territorin e komunës së Prizrenit. Ky fenomen i degradimit urban, ka vazhduar edhe gjatë kohës së pandemisë, që është paradoks i llojit të veçantë dhe në vijim do të paraqesim rastin më të ri, që po ndodh këto ditë. Në lokacionin tek udhëkryqi i vogël afër autostradës, ku gjendet pompa e derivative ‘Arbëria’ dhe pas servisit ‘Mercedes’ dhe sallonit të dasmave ‘Nafron’ tashmë është ndërtuar një kompleks i tillë dhe një tjetër ka filluar të ndërtohet pikërisht gjatë kohës së pandemisë”, ka thënë Totaj.

Më tutje, ai ka thënë se banorët e shqetësuar në këtë pjesë banimi, e kanë ngritur këtë çështje, dhe ata sipas tij kanë thënë se nga Drejtoria e Urbanizmit janë siguruar se ai projekt në ndërtim e sipër nuk ka leje nga drejtoria në fjalë, por se leja është dhënë nga Ministria e Ambientit dhe Planifikimit Hapësinor.

“Banorët e lagjes, kanë kontaktuar edhe me zëvendësministrin e Ambientit dhe Planifikimit Hapësinor, dhe nga ai është konfirmuar se ministria nuk jep leje për ndërtim në asnjë rast, por merret vetëm me ankesa në raste të veçanta. Nga ana tjetër, Inspektorati i Komunës së Prizrenit, nuk e pengon fare në punë investitorin, që do të duhej ta bënte një gjë të tillë, deri sa nuk ka fare leje. Imponohet pyetja, se pse nuk ka koordinim mes Drejtorisë së Urbanizmit dhe asaj të Inspektoratit? Si është e mundur që ndërtime të natyrës së tillë, të fillojnë në kohë të pandemisë? Kjo çështje përveç që duhet trajtuar nga aspekti ligjor dhe institucional, është edhe një tregues jo i mirë i moralit, sepse ka dyshime të bazuara se villa të tilla, nuk përdoren për qëllime të mira dhe me kësi veprime, askush nuk mund të krenohet”, është shprehur Haskuka.