PËRMASA LIRIE
(Shoqeve dhe shokëve, ish të burgosurë politikë të Burgut të Qarkut të Mitrovicës)
Shkruan: Lulëzim Etemaj
15 këmbë numër 41
Për së gjati
8 për së gjëri
Gjithsejt 360 këmbë së bashku
Plus një dritare 60 me 35 centimetra
Ku në vrimat e rrjetës mund të përbironte një cigare duhani
Kaq ishin përmasat e lirisë
Në Burgun e Qarkut të Mitrovicës
Pse kërkuam Republikë
Si shtesë e gjithë kësaj përmase
Vijnë edhe dy shëtitje
Njëra para e tjetra pasdreke
Pavarësisht stinës
Në njërin nga të dy rrathët e shetitorës
Dy nga nëntë rrathët e Dantës
Me duar pas shpindës
Me kokën poshtë dhe në heshtje
E gardianin automatikngjeshur në gjoks
Që n’karakoll na rrinte sipër kokës
Dajaku pa u lodhur fare
N’dorë serbi e n’dorë shqiptari
Mbllaçiste mish të njomë
Dhe thente eshtra të trupave tanë
N’qeli e përgjatë korridori!
“Republikë Kushtetutë, ja me hatër ja me luftë!”
“Republikë Kushtetutë, ja me hatër ja me luftë!”
Ishte kryesimfonia
E krismave të djemve dhe vajzave të Kosovës
Me grushta në muri
Që bënte të dridhej i tërë burgu
Drejtori e gardiani
Të dridhej edhe udbashi në ndërtesën përbri
Ditën e natën
Sikur të kishte rënë tërmeti.
