Arif Molliqi

1.

miqtë e mi në shenjë respekti

ma rezervojnë një dhomë në ferr

sepse ata e dinë se pas kësaj

aty nuk ka vend për të gjithë

ka nga ata që janë kokëfortë

nuk e dinë çfarë vdekje duan

të ngadalshëm

të ngutshme

të vuajtur

disa e dëshirojnë vdekjen para vdekjes

në ndonjë bordel

pasi t’i kenë përdorur dy viagra përnjëherë

miqtë e mi mendojnë të vdesin

në varkën e Noas

pasi jeta në tokë është rrugë qorre

e vdekja është prita e saj …

2.

vdekja është art i jetës

për njeriun edhe për kafshën

si në gjah ashtu edhe në luftë

sëmundja është akt i vdekjes

shfaqja e saj mund të zgjasë pesë minuta

pastaj mbaron dhimbja

kam parë kafshë duke ngordhur

me plot art

më shumë se disa vdekje të njeriut

te varrezat kam parë varre

por s’kam parë vdekje me art

3.

burgjet janë plot njerëz

çmenduritë janë të zbrazëta

edhe më shumë se kaq

në këtë krizë trishtimi

njerëzit kalojnë pranë çmendurisë

si para një vepre arti

jashtë të shurdhrit lëshojnë zërin

brenda të pafajshmit braktisin vetveten

4.

në këtë kohë

nuk më duhet letra

mbase në pluhurin e kozmosit

mund ta shkruaj testamentin

e dashurisë e seksit dhe vdekjes

5.

e kam parë një kurvë që vdiq

një të diele feste

(ka mundur me qenë edhe ditë xhumaje)

por që në aktin e vdekjes

kishte treguar klasë në seks

thonë se ajo vdiq me art

në luftë mes shumë aktorëve

mbase

regjisori i kishte tredhur

të mos mungonin në premierë

6.

lajm i mirë

në një seancë të purpurt

një zonjë

ia kishte fal publikut

një buzëqeshje të shtirur

derisa parlamentarët po digjeshin

nga kurmi

jashtë

lypsarët hungërinin për bukë

e dikush kollitej nga parfumi

që vinte nga flokët e ligjdhënësve