Situata e krijuar ekonomike si dhe kriza që ka kapluar vendin si rrjedhojë e ngritjeve enorme të çmimeve në aspektin botëror, përfaqësues të biznesit kërkojnë që sa më shpejt të ndërmerren masat e nevojshme për lehtësim dhe tejkalim të saj.

Oda e Afarizmit me anë të një reagimi publik ka kërkuar nga Qeveria e Kosovës që përkohësisht të largohet Tatimi mbi Vlerën e Shtuar për produktet esenciale për tre muaj, e pastaj vazhdimi nga 8 për qind në 5 për qind.

Gjithashtu, OAK kërkon nga institucionet një reagim më të shpejtë ndaj situatave që po krijohen në mënyrë që biznesi, punëtorët e sektorit privat dhe qytetarët të përballojnë më lehtë situatat e krijuara.

Sipas OAK-së, ndërmarrja e masave emergjente nga ana e shtetit, në mënyrë që t’i paraprijë situatave të cilat po ndodhin jo vetëm tek ne por edhe në tregjet botërore, do të ndikonte sadopak që të mbrohen qytetarët dhe operatorët ekonomik.

Nisur nga fakti që ndryshimet po janë të vazhdueshme, të papritura si dhe të reja për vendin tonë, OAK shprehu gatishmërinë që të përkrahë Qeverinë e Kosovës me propozime konkrete, në mënyrë që situate e krijuar aktuale të tejkalohet sa më shpejt dhe me sa më pak implikime për bizneset dhe shoqërinë në përgjithësi.

Oda e Afarizmit të Kosovës theksoi që veprime të tilla kanë bërë edhe vendet e rajonit, ndër të cilat së fundi edhe Republika e Maqedonisë së Veriut dhe Shqipëria, të cilat e kanë ngrirë marzhën e fitimit për produktet esenciale si dhe ka ulur TVSH-në nga 5 për qind në zero për qind. Ndërsa, TVSH për ushqim në Maqedoni është 5 për qind.