Pas përfundimit të Samitit Ukrainë-Europë Juglindore në Tiranë, presidenti ukrainas Zelensky, kryeministri Rama, presidentja Osmani dhe liderët e tjerë që ishin të pranishëm sot në Pallatin e Kongreseve drekuan në restorantin e njohur në kryeqytet “Padam”.

Zelensky dhe liderët e tjerë të Europës Juglindore u pritën nga shefi i restorantit, Fundim Gjepali, i cili publikoi në Instagram foto nga takimi i tij me Zelenskyn.

Në samit sot ishte i pranishëm edhe presidenti serb, Aleksandër Vuçiç, aleat i presidentit rus Vladimir Putin. Nuk ka  informacion nëse Vuçiç drekoi sot në Tiranë me Zelenskyn, Ramën dhe Vjosa Osmanin.

Gjithashtu sot në Samit  morën pjesë: Kryetarja e  Këshillit  të Bosnje-Hercegovinës, Borjana Kristok, presidentja e Moldavisë Maia Sandu, presidenti i Maqedonisë së Veriut, Stevo Pendarovski,  kryeministri kroat, Andrej Plenkovic dhe  presidenti i Malit të Zi, Jakov Milatoviç.