Rita Ora i ka argëtuar mijëra qytetarë që kanë dalë në qendër të Prishtinës për ta festuar përvjetorin e Pavarësisë së Kosovës.

Për ditën kur u shënuan 10 vjet shtet, ishte përgatitur një eveniment i madh muzikor, të cilin e zbukuroi këngëtarja shqiptare me famë botërore.

Rita është shfaqur në skenë rreth orës 22:00 dhe e ka nisur performancën e saj me këngët “I Will Never Let You Down” dhe “Shine Your Light”.

Me një spektakël fishekzjarrësh ka përfunduar koncerti i Ritës, ndërkohë që qytetarët vazhdonin ta shijonin atmosferën e bukur të krijuar në kryeqytet.

Ndërkaq, edhe veshja e saj është lidhur pikërisht për këtë ditë të rëndësishme, Rita Ora ishte paraqitur kuq e zi në skenë.

Me të përfunduar performancën, Ora është nisur drejt aeroportit “Adem Jashari” për t’u larguar nga vendi.

27-vjeçarja nëpërmjet rrjetit social Instagram ka treguar se nuk do të qëndrojë në Kosovë, por do udhëtojë menjëherë për të përmbushur angazhimet tjera të saj.