Për herë të parë në Prishtinë është mbajtur Trail Maratona “Prishtina Trail Marathon” e organizuar nga klubi i vrapit “XTrailer –fun run” në bashkëpunim me Federatën e Atletikës së Kosovës.

Kjo garë është mbajtur në parkun e Gërmisë në Prishtinë. Gjatë këtij organizimi, janë mbajtur garat në 3 disiplina, atë të 10, 21 dhe 42 kilometra. Ndërsa nuk ka munguar edhe organizimi për fëmijë, të cilët vrapuan për rreth një kilometër.

Kushtrim Zebica nga Komiteti Organizativ i kësaj maratone, ka pohuar se se gjithçka ka shkuar në mënyrën më të mirë të mundshme, duke iu falënderuar vullnetarëve të cilët kanë shprehur dëshirë që t’i ndihmojnë atyre në organizimin e kësaj gare.

“Sot është organizuar gara e parë ndërkombëtare e vrapimet me shtigje malore ‘Prishtina Trail Marathon’. Është hera e parë e cila organizohet në Kosovë, bartës i organizimit të këtij aktiviteti është klubi i ‘X-Trailer run, fun’. Këtë iniciative për organizim e kemi marrë duke u bazuar në bazë të përvojave që i kanë pasur anëtarët tonë me pjesëmarrjen në evente të llojit të tillë në vende të ndryshme evropiane dhe e kemi parë si nevojë dhe mundësi e cila i ka munguar kryeqytetit të Kosovës po gjithashtu edhe komplet shtetit tonë. Përveç karakterit sportiv kjo garë e ka një kauzë në vete, është run green, run clean, vrapo gjelbër, vrapo pastër, duke u bazuar se Prishtina ka qenë njëra nga qytetet e listuar për ka cilësia e ajrit më të dobët në botë”, ka deklaruar  Zebica.

Një ndër vullnetaret e cila ishte bashkangjitur në organizimin e këtij aktiviteti ishte edhe Leonora Aliu. Ajo kishte vendosur që të ju ndihmojë komiteti organizativ për arsye të shumta. Një ndër to ishte edhe arsyeja e këtij organizimi, ku sipas saj Prishtina duhet të ketë organizime të shumta të këtij lloji.

“Po sot kam vendosur me ju bashku ekipit të vullnetarëve, diku 75 vullnetar iu kanë bashkuar maratonës të XTrailer Prishtina Marathon. Është maratona e parë që po organizohet në 42 kilometra dhe është martona e parë që po organizohet në parkun e Germisë, dhe e cila e ka moton run green, run clean që i bie me vrapuar pastër dhe për gjelbërimin. Ideja e kësaj maratone është ti vetdijësojmë njerëzit rreth aktivitet sportive, rëndësinë e mbrojtjes së ambientit dhe duke e pasur parasysh se sa shumë ka nevojë Kosova për një ambient të pasur dhe për pyllëzimin e Kosovës, gjelbërimin e Kosovës kam vendosur që ti bashkohem kësaj ekipe, për të dhënë kontributin tim në mes të kësaj shoqërie”, ka thënë Aliu. Në këtë organizim pjesëmarrës ishte edhe shoqata Down Syndrom Kosova, e cila në këtë organizim promovoi produktet e tyre. Ndërkaq si gjithnjë ishte Medina Surdulli ajo e cila ka marrë pjesë në garën për fëmijë. Surdulli u shpreh tejet e lumtur me faktin se ishte pjesë e këtij organizimi dhe para fillimit të garës u shpreh se do të synonte ta fitonte së paku njërin nga tri vendet e para.

“Unë ndjehem shumë e lumtur edhe pse do të marrë pjesë në maratonë. Shpresoj që do të fitojë. Shpresoj që të marrë ndonjë medalje” u shpreh ajo. Në maratonën 10 kilometra në kategorinë e femrave fituese doli atletja nga Peja, Gresa Bakraqi e cila pas garës u shpreh tejet e lumtur me faktin se arriti të triumfojë në këtë garë. Kujtomë që në këtë Maratonën kanë marrë pjesë garues nga 18 vende të ndryshme të botës, dhe organizatorët premtuan se do të vazhdojnë çdo vit të organizojnë një gjë të tillë, por me moto të ndryshme./KosovaPress/