Kryeprokurori i Prokurorisë Themelore në Prishtinë, Zejnullah Gashi, gjatë konferencës së sotme për medie, ka bërë me dije se kanë përfunduar hetimet në rastin e vrasjes së Liridona Ademajt dhe se është ngritur aktakuzë ndaj tre të dyshuarve – Naim Murseli, Kushtrim Kokalla, Granit Plava dhe një personi tjetër që nuk u emërua gjatë konferencës.

“Siç e dini ky ka qenë rast i ndishëm, fillimisht ka qenë i inskenuar si grabitje, mirëpo falë angazhimit maksimal të hetuesve dhe prokurorëve brenda një afati të shkurtë kohor kemi arritur t’i zbulojmë kryesit e kësaj vepre penale. Ka qenë një çështje penale jashtëzakonisht e ndjeshme edhe sa i përket kompleksitetit të saj dhe janë zhvilluar hetime në shumë dimensione për arsye se kemi siguruar ekspertiza edhe brenda edhe jashtë vendit tonë”, ka thënë Gashi.

30-vjeçarja Liridona Ademaj ishte vrarë më 29 nëntor të vitit 2023 në fshatin Bërnicë të Prishtinës.

Naim Murseli, ish-bashkëshorti i Liridona Ademajt, akuzohet se ka përgatitur planin për ta vrarë atë, Granit Plava akuzohet si doras, ndërsa Kushtrimi Kokalla akuzohet se ka dhënë ndihmë në kryerjen e veprës penale.