Qytetarë të shumtë janë mbledhur sot para ndërtesës së Qeverisë së Kosovës në një protestë të organizuar nga grupi “Asnjë Cent ma Shumë”, për të kundërshtuar paralajmërimet për rritje të çmimit të energjisë elektrike.

Të pajisur me parulla si “Shteti hesht, qytetarët s’ndalen”, “Tarifat e reja, padrejtësi e re”, “KEDS-i t’i kthehet popullit” dhe “S’ka dritë me padrejtësi”, protestuesit shprehën pakënaqësinë ndaj kërkesës së kompanive energjetike për rritjen e tarifave për 15 për qind.

Ata kërkuan nga institucionet të ndalin këtë vendim, që sipas tyre rëndon jetën e qytetarëve dhe thellon pabarazinë ekonomike.

Aktivisti Besnik Shabiu theksoi se kërkesa e tyre drejtuar Zyrës së Rregullatorit për Energji (ZRRE) ka qenë e qartë që nga fillimi: të pezullohet menjëherë vendimi për rritje të tarifave dhe të hapet një diskutim gjithëpërfshirës për të ndërtuar një strategji afatgjate për sektorin energjetik në Kosovë.

“Qytetarët nuk e meritojnë të paguajnë më shumë për një sistem të dështuar. Ne kërkojmë një plan të qëndrueshëm, jo një vendim të nxituar që thellon varfërinë. Nëse deri më 11 prill nuk reflektohet, protestat do të vazhdojnë”, u shpreh Shabiu.

Organizatori tjetër Ali Sefaj ka deklaruar para masës se nuk do të lejohet shtrenjtimi i rrymës.

“Jemi mbledhur këtu për të treguar se nuk do të lejojmë që rryma të shtrenjtohet. Ai thotë se nuk do të ketë tërheqje mbrapa nga kërkesat e protestuesve. Ju bëjmë thirrje atyre që janë në ZRRE që të mos marrin vendim për shtrenjtim të rrymës”, ka deklaruar Sefaj.

Pas protestës në sheshin Skenderbeu, protestuesit vazhduan marshimin drejt ndërtesës së Ministrisë së Ekonomisë.

Aty ata vendosën parullat, në mënyrë që, sipas kur zyrtarët të shkojnë në punë, të shohin pakënaqësitë e qytetarëve.

Organizatorët e protestës në Prishtinë paralajmëruan protestë të re më 11 prill, nëse merret vendimi për rritjen e tarifave të energjisë.