Në Kazermën “Adem Jashari” të enjten u organizua ceremonia e përmbylljes së vitit të dytë të tranzicionit të Forcës së Sigurisë së Kosovës (FSK).

Në këtë ceremoni morën pjesë ministri në detyrë i Mbrojtjes, Anton Quni, komandanti i FSK-së, gjenerallejtënant Rrahman Rama, drejtori i NALT-it, gjenerali Frank Best, gjeneralë dhe oficerë të lartë të FSK-së, zyrtarë të Ministrisë së Mbrojtjes, përfaqësues të NALT-it, atashe dhe këshilltarë ushtarakë ndërkombëtar.

Në fjalën e tij, ministri Quni pasi ka përshëndetur të pranishmit dhe ka uruar për sukseset e arritura gjatë realizimit të planit dyvjeçar të tranzicionit të FSK-së.

“Sot shënojmë dyvjetorin e lansimit të planit gjithëpërfshirës të tranzicionit të Ministrisë së Mbrojtjes dhe FSK-së, andaj ndjehem krenar dhe i privilegjuar, që si ministër i Mbrojtjes të konstatoj se gjatë kësaj periudhe kemi arritur që të realizojmë pjesën më të madhe të aktiviteteve për këtë periudhë planifikuese, e në disa fusha e komponentë, edhe t’i tejkalojmë ato”, ka thënë Quni, duke shtuar se krahas këtyre sukseseve, brenda kësaj periudhe është avancuar sistemi i duhur i hartimit dhe zbatimit të politikave të mbrojtjes në fushën e planifikimit, programimit, modernizimit e standardizimit të forcave, bashkëpunimit ndërkombëtar e integrimeve euroatlantike, inteligjencës dhe sigurisë, sistemit të integruar të burimeve materiale, infrastrukturore e mbështetjes logjistike.

Komandanti i FSK-së, gjenerallejtënant Rrahman Rama ka thënë se kjo ditë shënon kalimin nga një fazë administrative, doktrinare dhe konceptuale në një fazë të ndërtimit të aftësive teknike, taktike dhe luftarake në nivel të njësive operacionale.

“Konsideroj se pa marrë parasysh sfidat me të cilat jemi përballë, si: tërmeti në Shqipëri, pandemia globale, përmbytjet dhe shkurtimet e vazhdueshme buxhetore, ne kemi arritur që jo vetëm të përmbushim detyrat e parapara në këtë fazë, por edhe t’i tejkalojmë pritshmëritë tona”, ka thënë Rama.

Ndërsa, drejtori i NALT-it, gjenerali Frank Best ka përgëzuar Ministrinë dhe FSK-në. “Ju përgëzoj për atë që është arritur deri më tani. Veçanërisht ju përgëzoj për qasjen tuaj transparente, angazhimin tuaj për mbikëqyrjen civile, qasjen tuaj multietnike dhe theksin mbi drejtësinë dhe sundimin e ligjit. Ishte një nder dhe gëzim për të gjithë ne, në NALT, t’iu ndihmojmë dhe t’iu këshillojmë mbi hapat e ndërmarrë me të gjitha mjetet dhe aftësitë që kemi në dispozicion. NALT-i do të vazhdojë të jetë në krahun tuaj. Ne do të qëndrojmë të përkushtuar ndaj mandatit tonë; për këshilla, lidhje dhe trajnime”, ka thënë Best.

Ceremonia u përmbyll me nënshkrimin e dokumenteve doktrinore nga komandanti i FSK-së, gjenerallejtënant Rrahman Rama, që janë bazë e zhvillimit dhe ngritjes së kapaciteteve të Forcës së Sigurisë së Kosovës.