Përplasja Qeveri – Presidencë për tarifën ndaj SHBA-së – Kadaj-Bujup: Vendimet për shtetin nuk janë për orar zyrtar, të shkojë mandati tu shqyrtu

03 prill 2025 | 22:38

Këshilltarja e Presidentes Vjosa Osmani, Donika Kadaj-Bujupi, ka reaguar ndaj deklaratave të ministrit të Financave, Hekuran Murati, i cili e kritikoi publikimin e menjëhershëm të kërkesës, duke theksuar se këto çështje duhet të trajtohen larg mediave.

Në një postim, Kadaj-Bujupi ironizoi me statusin e Muratit për kohën kur është pranuar kërkesa e Presidentes, duke thënë se vendimet e rëndësishme nuk kanë orar zyrtar.

“Ministri i Financave në detyrë qenka anku që Kryeministri ka marrë një shkresë nga Presidentja pas orarit të punës. Po qysh bre, a mbyllet Qeveria në ora 16:00? Kur është puna për vendime të rëndësishme për shtetin, s’ka orar zyrtar,” shkroi ajo.

Kadaj-Bujupi gjithashtu kritikoi Muratin për zvarritjen e vendimeve të rëndësishme, duke përmendur se ai ka pasur kohë për të shqyrtuar çështjen e tarifave që nga viti 2023, por ka neglizhuar çështje të tjera me rëndësi, si përfitimet për invalidët e luftës dhe marrëveshjet e investimeve me Katarin.

“Na paska njoftu edhe që prej 2023-ës e paska ‘shqyrtu’ këtë propozim. Paskemi prit boll atëherë! Ama për disa çështje paska kohë me shqyrtu sa të dojë, e për disa tjera s’po ngutët hiç. Për invalidët e luftës, për shembull, iu dasht me u marrë me buxhetin për proteza derisa njerëzit kanë mbet në shtrat, tuj prit për një shtraf… Qenka i shpejtë vetëm kur i konvenon! E marrëveshjet me Katarin? Një prej aleatëve më të mëdhenj të Amerikës, me potencial të madh për investime? Edhe ato i ke mshelë në sirtar, tu prit mos po shqyrtohen vetë,” shtoi ajo.

Kadaj-Bujupi theksoi se puna e ekzekutivit nuk është vetëm të shqyrtojë, por të veprojë në interes të qytetarëve. Ajo kërkoi që çështja e tarifave të mos vonohet më tej dhe të veprohet me urgjencë për t’i forcuar marrëdhëniet me Shtetet e Bashkuara të Amerikës.

Lajme të sponsorizuara

Të fundit
Pas reagimeve të Ministrit të Financave, Hekuran Murati, ndaj kërkesës…