ASGJË S’MË BËN PËRSHTYPJE

Përshtypje do të më bënte kur

Bamirësitë të mos ekspozoheshin;

Përshtypje do të më bënte kur

Politikanët të interesoheshin për popullin e vet;

Përshtypje do të më bënte kur

Artistët nuk flasin për veprat e tyre;

Përshtypje do të më bënte kur

Njerëzit qëndrojnë dhe bisedojnë

Edhe me ata që nuk pajtohen në mendime;

Përshtypje do të më bënte kur

Gazetarët ta mbrojnë interesin e popullit

E jo atë të politikanëve, kupto interesin e vet;

Përshtypje do të më bënte kur

Femrat të interesohen edhe për të drejtat e meshkujve;

Përshtypje do të më bënte kur

Gruaja të respekton burrin dhe familjen e tij siç duhet

Dhe anasjelltas;

Përshtypje do të më bënte kur

Njerëzit të flasin me njëri-tjetrin,

Me dashuri të sinqertë!

VDEKJA ËSHTË FEMËR

Vdekja nuk vjen kur dëshironi ju

Por, kur dëshiron AJO,

Sepse ajo është femër,

Ka tekat e saj,

Ka përvojën e saj,

Ka zgjuarsinë e saj.

Vetëm ajo ka fuqinë të nënshtrojë,

Të rrëzojë

Dhe të merr me vete

Ku t’i dojë qejfi ASAJ.

MË FALNI!

Kërkoj faljen tuaj, familja ime!

Gruaja ime dhe djemtë e mi!

Që nuk isha me ju në kohën e duhur.

Kërkoj faljen tuaj që nuk isha pranë jush,

T’ju ledhatoja,

T’ju puthja,

E t’ju doja siç do të duhej.

Kërkoj faljen tuaj që nuk isha me ju

Në gëzimet dhe hallet e juaja!

Unë kërkoj faljen tuaj,

Po edhe sikur të më falnit,

A do ta meritoja një falje të tillë?

PSE TË VDESIM?

Ç’janë gjitha këto vdekje rreth nesh?

Për ku po drejtohen këta vdekatarë?

Pse po na vdesin njerëzit tanë, të dashurit tanë?

Ç’është ky rreng?

Ç’është kjo hile?

Pse të lindim… që të vdesim…?

Pse nuk qëndrojmë në boshllëkun e pafundësisë së palindur?

Pse të dimë vetëm të sotmen

E të mos dimë për udhëtimin tonë nga e panjohura që dikur ishim

Drejt së panjohurës që po na pret?

Dua të jem i mirinformuar se ku po shkoj.

Kam të drejtën time absolute.

S’dua të jetoj me idenë që një ditë më duhet edhe të vdes

S’dua!

Protestoj!

KUR TË VDES

Kur të vdes,

Mos më qani kot

S’kam asnjë ndjeshmëri më për ju.

Më qani sa jam i gjallë,

Më doni sa të jem gjallë,

Sepse kur të vdes

Do të kaloj në një dimension tjetër

Ku s’ka asnjë lidhje frekuence me këtë botë,

Që jemi mësuar ta jetojmë.