Një helikopter ushtarak “Mi-8” është rrëzuar gjatë stërvitjeve në perëndim të Ukrainës, duke shkaktuar vdekjen e katër anëtarëve të ekuipazhit dhe të komandantit të tyre.

Lajmi është konfirmuar të enjten nga zyra për medie e Forcave Tokësore të Ukrainës.

Sipas saj, Forcat Tokësore e kanë humbur kontaktin me helikopterin të mërkurën mbrëma, në orën 23:27, sipas kohës lokale.

Agjencitë e zbatimit të ligjit ndodhen në vendin e ngjarjes në rajonin Rivne.

Duke reaguar ndaj lajmit, presidenti i Ukrainës, Volodymyr Zelenskiy, ka thënë përmes një postimi në “Twitter” se “nuk është një mëngjes i mirë”.

Ai e ka urdhëruar shefin e ushtrisë së Ukrainës, gjeneralin Ruslan Khomchak, “të hetojë rrethanat e tragjedisë”.