Futbollisti uruguaian Juan Izquierdo, i cili u rrëzua në fushë pasi pësoi një kolaps javën e kaluar, ka ndërruar jetë në spital, njofton ekipi i tij Club Nacional.

27-vjeçari ishte duke iu nënshtruar trajtimit mjekësor që kur u rrëzua gjatë ndeshjes së dytë të raundit të 16-të të Copa Libertadores kundër Sao Paulos në stadiumin Morumbi të Brazilit më 22 gusht.

“Me pikëllimin dhe tronditjen më të thellë në zemrat tona, Club Nacional njofton vdekjen e lojtarit tonë të dashur Juan Izquierdo. Ne shprehim ngushëllimet tona më të sinqerta për familjen, miqtë, kolegët dhe të dashurit e tij. I gjithë Nacional është në zi për humbjen e tij të pariparueshme”, shkroi Nacional në X.

Alejandro Domínguez, presidenti i organit drejtues të futbollit të Amerikës së Jugut, gjithashtu shprehu ngushëllimet e tij për familjen dhe miqtë e Izquierdo. “Futbolli i Amerikës së Jugut është në zi,” shtoi ai.

Sao Paulo tha se ata ishin thellësisht të pikëlluar nga lajmi, duke e quajtur atë një ditë të trishtuar për futbollin.

Izquierdo u dërgua në spitalin “Albert Einstein” pasi u rrëzua të enjten e kaluar.

Spitali tha në një deklaratë të martën vonë se Izquierdo kishte arrest kardio-respirator të lidhur me aritminë e tij kardiake.

Mjekët në spital kishin thënë në një deklaratë të hënën se Izquierdo po përjetonte rritje të presionit intrakranial.

Ai ishte në një ventilator që nga e diela dhe nën kujdesin kritik neurologjik që nga e hëna, përcjell tch.

Ligat e futbollit të Uruguait të kategorisë së parë dhe të dytë u shtynë në fundjavë për shkak të shqetësimeve për shëndetin e Izquierdo.

Lojtarët e Sao Paulos mbanin një fanellë në mbështetje të futbollistit uruguaian përpara fitores 2-1 të skuadrës në ligën braziliane kundër Vitoria të dielën.

Izquierdo kishte zëvendësuar Sebastian Coates për skuadrën uruguaiane në pjesën e parë të ndeshjes kundër Sao Paulo, por mbrojtësi ra në tokë pa ndjenja në minutën e 84’ pas një kolapsi të pësuar.

Lojtarët e të dyja palëve kanë kërkuar menjëherë ndihmë mjekësore.

Ende pa ndjenja, Izquierdo u largua nga fusha me një ambulancë nën duartrokitjet e tifozëve, përpara se të trajtohej në njësinë e kujdesit intensiv të spitalit “Albert Einstein”.

Karriera profesionale e Izquierdo filloi në vitin 2018 në klubin lokal Cerro.

Ai u bashkua me Peñarol vitin e ardhshëm, por nuk mori shumë kohë për të luajtur. Mbrojtësi më pas u transferua te Montevideo Wanderers.

Izquierdo u nënshkrua nga Nacional në vitin 2022, luajti një ndeshje dhe më pas u transferua te klubi lokal i Liverpoolit.

Mbrojtësi ishte një nga lojtarët më të mirë të Liverpoolit në fushatën që e çoi skuadrën drejt titullit të ligës së Uruguait në vitin 2023, i pari i klubit në më shumë se një shekull.

Izquierdo u kthye në Nacional këtë vit dhe po konkurronte për një pozicion në formacionin fillestar me veteranin Coates, i cili luajti për kombëtaren e Uruguait. Ai luajti 23 ndeshje këtë vit dhe shënoi një gol.