Drejtori i të ashtuquajturës zyrë për Kosovën në qeverinë serbe, Petar Petkoviq, ka reaguar pasi kryeministri i Kosovës, Albin Kurti, ka folur për parregullsitë në zgjedhjet e Serbisë, gjë të cilën e kanë evidentuar edhe organizatat kredibile ndërkombëtare.

Petkoviqi ka thënë se Kurti sot i është bashkuar partive opozitare serbe “në sulmin ndaj presidentit të Serbisë”. “Kurti, duke akuzuar Aleksandër Vuçiqin dhe Beogradin për parregullsi joekzistente në zgjedhje, ka qëndruar krah për krah me atë pjesë të opozitës serbe e cila prej ditësh sulmon presidentin e Serbisë pa asnjë bazë dhe pa asnjë provë, duke përdorur një narrativë identike edhe në Beograd edhe në Prishtinë”, ka thënë ai.

Kryeministri Kurti ka kërkuar të premten nga Bashkimi Evropian (BE) të merret me Serbinë dhe Vuçiqin që i ka vjedhur zgjedhjet në Serbi.

“Besoj që Brukseli dhe emisari evropian Lajçak do të merren shumë më tepër me Presidentin e Serbisë Vuçiq që i vodhi zgjedhjet në Serbi me ndihmën e Dodikut, Mandiqit e Radoiçiqit (sidomos në Beograd) dhe që u tërhoq nga marrëveshja bazike e 27 shkurtit 2023 (përmes letrës së kryeministres Ana Bërnabiq), në vend se të na bëjnë presion publik me opsione që e shndërrojnë Kosovën demokratike e pro-evropiane në temë problematike”, ka shkruar Kurti në “Facebook”.