Ambasadori i Gjermanisë në Kosovë, Jorn Rohde, ka reaguar për një incident në veri ku mbeti i plagosur një qytetar serb në Zveçan.

Ai të martën është kritikuar nga drejtori i të ashtuquajturës “Zyre për Kosovën” në Qeverinë e Serbisë, Petar Petkoviq, i cili ka kërkuar nga ambasadori të reagojë, duke shtuar se “për raste tjera ai reagon në sekonda”.

Për këtë rast ka pasur reagime nga Ambasada e ShBA-së në Kosovë, por edhe prej zyrës së Bashkimit Evropian. Ndërkaq të mërkurën ka ardhur edhe reagimi i Ambasadës së Gjermanisë.

Përmes një postimi në “Twitter”, ambasadori gjerman ka kërkuar nga policia hetim të gjerë.

Ai është pajtuar me reagimin e Bashkimit Evropian në Kosovë që ka dënuar incidentin, duke thënë se ishin të përfshirë edhe zyrtarë të policisë.

Policia e Kosovës të martën ka suspenduar katër zyrtarë të saj në lidhje me incidentin.

“Jam plotësisht dakord. Një tjetër incident shqetësues sigurie. Është mirë ta shohësh atë se Policia e Kosovës  ka reaguar duke hetuar gjerësisht rastin. Sjellja e mundshme e keqe nga policia duhet të shqyrtohet si çdo tjetër. Viktimës i uroj shërim të shpejtë”, ka shkruar ambasadori Rohde.