Prof. Haki Mulliq

Me rastin e shënimit  të 15 vjetorit të Pavarësisë së Kosovës në Teatrin Shqiptar të Shkupit u shfaq  koncerti i  Ansamblit Kombëtar Shqiptar i R.M.V.

Koreografia, premierë absolute “Baresha” punuar mjeshtërisht nga koreografi Feim Leka arriti të sjellë një “bareshë” të brumosur me karakterin e fuqishëm individual dhe të korrespondonit me vetën e tij , me artistët dhe publikun duke dëshmuar forcën e imagjinatës së  tij artistike dhe krijuese!

Të përjetosh, në kuptimin e strukturës me figura lëvizëse dhe reflekse, hije dhe muzikë është të  mbërthesh në heshtje dhe harmoni rreth strumbullarit të idesë artistike dhe kreativitetit krijues. Në fakt “Baresha” ndodhë duke ofruar një komunikim mes artistit dhe shikuesit , muzikës e motivit  dhe kërkimit të një identiteti artistik  si dhe reflektim e formë!

Është “Baresha” e cila mundësoi përjetimin e korrespondimit rrëqethës, dhe këtu fle bukuria e “Bareshës” , tek shikuesi dhe artisti në skenë duke akumuluar një sërë motivesh kyçe  të shprehura me shumë lëvizje dhe motive artistike brenda një universi, pra  motivi i ëndrrës që intensifikohet në gjithë performansën e  cila në  çdo çast avancon dhe i ngjan një ëndrre në ëndërr!

Kompozitori Agron Syla, duke përdorur temën nga  perla e muzikës shqiptare “Baresha” arriti të sjellë përjetimin dhe ndjesinë që korrespondon dhe rrëshqet  në fushën e artit koreografik shqiptar.  Realiteti artistik hedh magjinë e  artistit të  magjepsur nga vizioni i  pafundësisë mes krijuesit dhe muzikës me origjinalitetin autonom muzikor, që komunikojnë me  njëra-tjetrën në artin e kërcimit popullor shqiptar, kështu nga bagazhi i tij artistik -krijues  forcon idenë e një imazhi të dallueshëm shqiptar. Kompozitori Agron Syla , në orkestracionin e tij të shkëlqyer solli një mendim të fuqishëm poetik dhe estetik i mishëruar me tone melankolike, i shtrirë fuqishëm në shtratin e artit koreografik shqiptar!

Xhubleta shqiptare, tani në UNESKO, veshur mbi trupin e kërcimtarëve vitale dhe grandioze të ansamblit solli një pjesë të trashëgimisë kulturore  dhe historike shekullore të identitet dhe  lashtësisë artistike kombëtar.

Solistët e mrekullueshëm të Ansamblit Shtetëror i Këngëve dhe Valleve Popullore Shqiptare në R.M.V. Besarta Murtezani dhe Nexhat Suma, si dhe orkestra profesionale e ansamblit krijuan atmosferë të ngrohtë artistike me interpretimet dhe ekzekutimin e tyre të muzikës së pastër shqiptare!

Ansambli “Drenica” nga Skënderaj, me këngët e interpretuara në frymën e ditës së Pavarësisë së Kosovës ngjallen emocione të thella tek publiku në sallën e Teatrit Shqiptar të Shkupit!

Bardhësinë dhe shkëlqimin mitik tek të pranishmit në sallë e solli Plisi, simboli i lashtë pellazgo-ilir – shqiptar dominoi në sallë dhe në skenë! I gjithë teatri frymoçi shqip në 15 Vjetorin e Pavarësisë së Kosovës dhe në Ditën e Plisit