LOJË PUZZLE ME COPA ZEMRE

Kësaj skene

i mungon një linjë dashurie

një çlirim emocionesh

jemi lodhur nga narracionet e mëdha

nga moralizimet

Thjesht

një linjë dashurie

Ky është një copë tekst

me aq pak fjalë dashurie

dhe nuk dihet kush e ka shkruar

fetarët e të gjitha feve

përjashtojnë Zotin nga autorësia

njëjtë bëjnë edhe ateistët

Bota është një fushë puzzle me copa zemrash

që duhet organizuar

Mu aty ku janë thesaret

ka munguar gërmimi

e krejt mjeshtëria është

me ditë edhe sa me zbritë në thellësi

Çuditem me ata që nuk arritën

me ba një kombinim si duhet

në këtë lojë puzzle

me copa zemre

NATA E RIPARIMEVE

Nata i ngjitet lodhshëm një përpjetëze kujtimesh

e njeh atë rrugë sapo të fiket drita

te kryet e krevatit

e di si i dilet në krye

duke u ndalur pushuar

duke u munduar me i lëshue

disa peshë të rënda të tepërta

që vrasin më shumë

Është çasti kur fillojnë

rindërtimet riparimet

zgjatjet shkurtimet

Po nata shumë e shkurtër

ëndrra shumë e gjatë

ç’nuk kemi mundur t’i shtojmë të parës

i kemi hequr të dytës

Ndaj e kemi të rëndësishme

përherë këtë natë

TAKIM ME DYER TË MBYLLURA

Sot jam takuar me të gjithë ata që janë ngritur mbi dhembjet e tyre

si një mundësi me u riba me copat e thyera

me ata që i kanë dëgjuar të tjerët të thonë se s’bën

(andaj s’kanë dashur me e çu mundin dam)

dhe me ata që pasi e kanë peshuar mirë

sa mundet me u largu njeriu nga zemra e vet

e me u njohë prapë prej saj

nuk kanë besuar me u largu edhe aq

Ishte shumë interesant me pa

si humb udhën kuraja

nëpër mjegulla arsyetimesh

si ia injektojnë pak nga pak arsyen me mungu

në fillim kur s’është aq e domosdoshme

pastaj mungon vetë

Kam parë si shpërthejnë vullkanet e mllefit

koren e brishtë të sapovënë

të një pajtimi me gjysmëzemër –

njëjtë si në nisje të sqotës –

njerëz më besoni nuk po ju gënjej

krejt këto së pari i kam parë në zemrën time

por kur e kam ngritur kokën

njëjtë ishte deri në fund të botës

Tash unë

ai që i priti në seancë të mbyllur

të gjithë ata tipat e tjerë të vetes

(informata rrodhi dikah

përmes atyre të çarave të brendshme

të cilat s’ka kush që i mbyll)

i marrë të gjithë përdore

dhe provoj t’i pajtoj

se jemi të dënuar

të rrjedhim të gjithë bashkë

këtij lumi të thellë

të paradokseve njerëzore

DEMANT LUFTËS

Jua kam dëgjuar të gjitha arsyetimet politike

përse ndodhin luftërat

shpjegimet si dallojnë njëra nga tjetra

arsyetimet për drejtësinë e saj

për kauzat synimet

si dhe ato përse nuk gjenden zgjidhje

në tavolinë

Ndaj jam ndikuar

kam marrë anë

anën e të shtypurit

çlirimtarit mbrojtësit

anën e atij që lufton për lirinë e vet

për lirinë time

Por për një fëmijë të vetëm të vrarë

jua vras të gjitha këto arsyetime

SPECIA JONË

Seancë nga karantina

Specia jonë ka shkuar në luftë në emër të Zotit

i ka luftuar të gjithë armiqtë e tij

se nuk ka dashur me e lanë atë pa mbrojtje

përballë ateistëve të djallit e femrave që joshin në mëkat

dhe gjithë atyre që s’duan të jenë si na

se zoti nuk krijon ndryshe

Pastaj ka bërë shpikje që vetë Zoti s’ka mundur me i ba

shoqërinë e të barabartëve

dhe i ka ngritë tempuj Dyshimit

Specia jonë është pajtuar me të gjitha tragjeditë

sepse gjithçka vjen prej zotit

pastaj është zhytur me gjetë si me i ndalu

dhe ka ngelur në këtë moçal konfuzioni

duke pritur me dalë nesër

Diku në pyllin e dendur

specia jonë shkroi: i njomi për t’thatin nuk bën të digjet

Prandaj

nëse Zoti i lexon këto vargje

le ta kuptojë mirë

se ka me na mbetë hatri

po s’na i respektoi ligjet