Policia e Kosovës ka njoftuar se  gjatë një operacioni policor ka arrestuar një person, si dhe ka kontrolluar disa lokacione ku ka sekuestruar narkotikë e gjësende  të tjera.

“Në vazhdën e veprimeve të mëtejme policore në bashkëpunim me autoritetet kompetente,  në konsultim me prokurorin kujdestar të krimeve të rënda si dhe me urdhër verbal të gjyqtarit të procedurës paraprake, është bërë kontrollimi i katër lokacioneve (banesave) të personave të dyshuar të cilat i kanë përdorur për shitje dhe shpërndarje të narkotikëve.  Tek i dyshuari E A. (1992) në momentin e ndalimit janë gjetur një (1) revole  e kalibrit 7.62 mm me dy karikatorë me gjithsej 16 fishekë të kalibrit 7.62 mm, një telefon i modelit ‘Iphone 11’, një çantë e zezë  në cilën ishin  570 euro para të gatshme si dhe një çelës i derës”, ka njoftuar policia.

Sipas policisë, personi i dyshuar E.A është arrestuar dhe dërguar në mbajtje, përderisa lidhur me këtë rast është intervistuar edhe një femër e mitur e cila pas intervistimit në prezencë te prindit është liruar.

Po ashtu, policia ka njoftuar se ka konfiskuar një automatikë “A47”, disa fishekë, një veturë, etj.