![](https://www.epokaere.com/wp-content/uploads/2022/09/1B211FC5-2C2E-4E09-8330-BDD233BC6679.png)
Policia e konfirmon: Në Fushë-Kosovë pati të shtëna në drejtim të një automjeti
18 shtator 2022
| 23:26
Policia e Kosovës ka konfirmuar se rreth orës 19:10 është raportuar për të shtëna me armë zjarri në rrugën “Dardania” në Fushë-Kosovë.
Sipas policisë rasti ka ndodhur saktësisht në afërsi të një pompe të derivateve.
“Në vend të ngjarjes kanë dalur njësitet relevante policore, përfshirë ato të Reagimit të Shpejtë, dhe Njësia e Hetimeve. Sipas informacioneve fillestare dyshohet se në drejtim të një automjeti është shtënë me armë zjarri”, ka deklaruar zëdhënësi i Policisë së Kosovës Daut Hoxha.
Gjithashtu u theksua se një person i dyshuar është larguar nga vendi i ngjarjes në drejtim të panjohur.
“Policia është duke kryer hetimet intensive dhe janë duke u trajtuar dëshmi në lidhje me rastin për të zbardhur rrethanat e këtij incidenti kriminal”./