Policia e Kosovës ka bërë me dije se ka angazhuar njësi policore për ndalimin e hyrjes në Kosovë të zyrtarëve të lartë të Serbisë, konkretisht ministrin e Mbrojtjes, Aleksandër Vulin dhe të ashtuquajturin shef i Zyrës për Kosovën, Marko Gjuriq.

“Policia e Kosovës bazuar në planifikimet e saja policore, në zbatim të vendimit të Ministrisë së Punëve të Jashtme të Republikës së Kosovës (RKS) për ndalim të vizitës në Kosovë të zyrtarëve serbë z. Vulin dhe z. Gjuriq, ka angazhuar njësi relevante policore për implementim të këtij vendimi. Sipas informacioneve dhe deklarimeve të vetë zyrtarëve serbë, të njëjtit kanë deklaruar se edhe përkundër vendimit zyrtar të autoriteteve të Kosovës për ndalim të hyrjes së tyre, ata do të realizojnë vizitën e tyre të planifikuar në veri të Mitrovicës”, është thënë në njoftimin e Policisë.

Sipas këtij njoftimi, Policia e Kosovës me qëllim të zbatimit të vendimit zyrtar të autoriteteve shtetërore, ka angazhuar njësi relevante policore të cilat do të veprojnë konform situatës në raport me vendimin e MPJ-së së RKS-së.

“Ndërsa do të ju lejohet hyrja vetëm personaliteteve të cilët do të kenë leje zyrtare të autoriteteve të shtetit të RKS-së, për të realizuar vizitat e tyre të planifikuara sipas kërkesës zyrtare”, është thënë në këtë njoftim.