Policia e Kosovës ka bërë me dije se do të veprojë në kuadër të planit të Qeverisë së vendit në vizitën e planifikuar për nesër ( e shtunë) të presidentit të Serbisë, Aleksandër Vuçiq, në veri të Kosovës.

Përderisa Vuçiqi është duke insistuar që ta vizitojë edhe liqenin e Ujmanit, i cili ndodhet në pjesën veriore, Ministria e Punëve të Jashtme ia ka refuzuar kërkesën për ta vizituar këtë vend.

Në një deklaratë për “kallxo.com”, drejtori i Policisë së Kosovës, Rashit Qalaj, ka thënë se policia do t’i zbatojë urdhrat e qeverisë gjatë kësaj vizite.

“Policia e Kosovës do te jetë aty. Policia e Kosovës nuk do të lejojë që të thehet qëndrimi i planit të qeverisë”, tha drejtori i përgjithshëm i Policisë së Kosovës, Rashit Qalaj.

Ai ka thënë se Policia “do të ndërmarrë të gjitha masat të cilat janë paraparë” për vizitën e Presidentit serb në Kosovë.

“Plani i policisë është bërë në përputhje me agjendën e qeverisë e cila ka kundërshtuar vetëm një pikë nga kërkesa e Vuçiq. Nuk do të jetë sfidë kjo për Policinë e Kosovës pasi që është hartuar plani për vizitën e Vuçiq në Kosovë”, ka thënë Qalaj.