Policia e Kosovës është duke intervistuar një person që pretendohet se është i dyshuari kryesor për vrasjen e 27-vjeçarit, A.J, të mërkurën në Prishtinë.

Zëdhënësja e Policisë së Kosovës për rajonin e Prishtinës, Flora Ahmeti e ka konfirmuar për “Radion Evropa e Lirë”, se është duke u realizuar intervistimi.

“Është një person duke u intervistuar në stacion policor për rastin e vrasjes së djeshme. Dyshohet se është i dyshuari kryesor”, ka thënë Ahmeti.

Viktima, me inicialet, A.J, është vrarë të mërkurën rreth orës 11:30 në rrugën “Haxhi Zeka” në kryeqytet, derisa ishte duke lëvizur me veturën e tij.

Motivet e vrasjes ende nuk janë bërë publike nga institucionet e drejtësisë.