Njësitet policore të Drejtorisë Rajonale të Policisë në Prishtinë gjatë ditës së djeshme në tri raste të ndara kanë konfiskuar pesë armë zjarri, një armë e ftoftë, një sprej si dhe fishekë të llojeve dhe kalibrave të ndryshëm.

Aksioni i parë është realizuar nga njësitet policore të stacionit të Lipjanit, i cili ka rezultuar me arrestimin e një personi të dyshuar, të cilit i janë gjetur dhe konfiskuar dy revole, një  thikë si dhe 66 fishekë të ndryshëm.

Ndërsa dy rastet e tjera të konfiskimit të armëve kanë ndodhur, njeri në  rrugën “Johan V. Han” dhe tjetri në rrugën “Tirana” në Prishtinë me ç’rast janë arrestuar tre persona të dyshuar.

“G. A 18 vjeç të cilit i janë gjetur dhe konfiskuar një revole, një sprej si dhe një karikator me 5 fishekë. E. K  49 vjeç, të cilit i janë gjetur dhe konfiskuar një revole si dhe një karikatorë me 5 fishekë. N. S  44 vjeç të cilit i janë gjetur dhe konfiskuar një revole dhe një karikator me 3 fishekë. Ndaj të gjithë personave të dyshuar, janë iniciuar rastet mbajtje në pronësi, në kontroll, në posedim ose në shfrytëzim të paautorizuar të armeve”, është theksuar në njoftimin e Policisë së Kosovës.

Që nga 1 janari i këtij viti nga njësitet policore të Drejtorisë Rajonale të Policisë në Prishtinë janë konfiskuar 135 armë, 1 249 municione të llojit dhe kalibrit të ndryshëm, dhe janë iniciuar 126 raste mbajtje në pronësi, në kontroll, në posedim ose në shfrytëzim të paautorizuar të armeve.