Drejtoria e Policisë ka refuzuar kërkesën e Partisë Demokratike (PD), për të protestuar para Kuvendit të Shqipërisë më 5 mars në orën 09:00, ashtu siç subjekti opozitar kishte kërkuar lejë më përpara.

Në korrespondencën në mes të zyrës së PD-së dhe policisë, janë renditur edhe arsyet pse kjo e fundit ka refuzuar lejen ndaj opozitës, për të protestuar në sheshin para parlamentit.

Dhuna e ushtruar ndaj anëtarëve të Kuvendit, dhuna ndaj punonjësve të policisë, duke përdorur edhe mjete të forta, thirrjet me përmbajtje dhune nga ana e organizatorëve, janë disa nga arsyet që Policia e Shtetit ka renditur në letrën ku refuzon lejen për tubimin.

“Kërkesa juaj për tubim para parlamentit, cënon sigurinë e institucionit me rëndësi të veçantë, siç është Kuvendi i Shqipërisë, pengon hyrjen në të të deputetëve, administratës dhe punonjësve të tjerë, vë në rrezik jetën e tyre dhe pengon zhvillimin e punimeve të parashikuara për në orën 10:00 të kësaj date, ndaj ndalohet zhvillimi i tubimit tuaj në vendin që keni kërkuar”, është thënë në letrën e policisë.

Policia e Shtetit ka ftuar opozitën që të protestojë paqësisht në një tjetër hapësirë, ndërsa kujton se në rast të shkeljes së vendimit të saj, organizatorët do të mbajnë përgjegjësi administrative dhe penale.