Ndër prioritet kryesore strategjike të Policisë së Kosovës janë ngritja e vazhdueshme e kapaciteteve të brendshme, sigurimi i ruajtjes së nivelit të profesionalizmit dhe integritetit të lartë të zyrtarëve të policisë, zbatimi i ligjit në harmoni me praktikat dhe standardet më të mira.

Policia e Kosovës ka njoftuar se aftësitë dhe shkathtësitë e zyrtarëve policorë janë në zhvillim të vazhdueshëm, me qëllim që në çdo moment t’u përgjigjen sfidave me të cilat ballafaqohen.

“Në vitin 2021, Polica e Kosovës, krahas trajnimeve të planifikuara, trajnimeve të brendshme dhe ricertifikimit, ad hoc ka zhvilluar tri lloj trajnimesh shtesë, shumë të rëndësishme, në tri fusha specifike, me raste të atyre fushave zyrtarët policorë ballafaqohen çdo ditë. Trajnimet e realizuara janë: Të drejtat e njeriut dhe autorizimet policore; Trajtimi i rasteve të dhunës në familje; dhe Raportimi i informatave në Sistemin Informativ të Policisë së Kosovës. Numri i zyrtarëve policorë që kanë ndjekur këto trajnime janë si vijon: Të drejtat e njeriut dhe autorizimet policore, janë realizuar 153 trajnime me 3985 pjesëmarrës; trajtimi i rasteve të dhunës ne familje, janë realizuar 114 trajnime me 3734 pjesëmarrës dhe raportimi i informatave në Sistemin Informativ të Policisë së Kosovës (SIPK), janë realizuar 132 trajnime me 3536 pjesëmarrës”, ka njoftuar Policia e Kosovës.

Pjesëmarrja në këto trajnime ka përfshirë nivelin qendror (Drejtorinë e Përgjithshme të Policisë) dhe atë lokal (Drejtoritë Rajonale Policore dhe Stacionet Policore), ku kujdes i është kushtuar përfaqësimit etnik dhe gjinor të pjesëmarrësve në trajnime.