Zoran Vuletiq, kryetar i Forumiit Demokratik Qytetar, ka thënë se lëvizjet e pushtetarëve në Prishtinë janë rezultat i marrëveshjeve të mëparshme në mes të Kosovës dhe Serbisë, por me transparencë të pamjaftueshme ndaj qytetarëve.

Për dallim nga Serbia, që e akuzon Kosovën për “politikë të drejtuar kundër serbëve në Kosovë”, një pjesë e opinionit politik vlerëson se ngjarjet në veri janë rezultat i marrëveshjeve të arritura më parë në kuadër të dialogut.

Vuletiq ka thënë për “RTK2” se largimi i institucioneve ilegale serbe nuk është befasi, por pjesë e marrëveshjes që është negociuar prej vitesh.

“Është e qartë se në kuadër të atyre negociatave është arritur një marrëveshje mes Beogradit dhe Prishtinës që institucionet paralele të hiqen. Duket se kjo po ndodh pikërisht tani”, ka thënë Vuletiq, duke shtuar se problemi kryesor është mungesa e informacionit të publikut serb për këtë.

“Fakti që kjo është bërë pa dijeninë e publikut serb dhe popullit të Kosovës, dëshmon reagimin e butë të autoriteteve serbe ndaj këtyre ngjarjeve. Marrëveshjet janë arritur, por nuk janë paraqitur në mënyrë transparente para qytetarëve, gjë që na ka çuar në gjendjen aktuale”, ka thënë ai.

Më tutje, Vuletiq ka kritikuar mungesën e komunikimit ndërmjet autoriteteve dhe qytetarëve, duke theksuar se përfitimet e këtyre marrëveshjeve mund të ishin paraqitur qartë, veçanërisht në kontekstin e afrimit të Serbisë dhe Kosovës ndaj Bashkimit Evropian.

“Është mirë që u ra dakord për heqjen e institucioneve paralele, por qeveria është përgjegjëse, sepse nuk iu shpjegua opinionit. Nëse do të ishte kontekste dhe përfitime pozitive, mund të nxirren për të dyja palët, në vend të përshkallëzimit të problemit tani”, ka thënë Vuletiq.

Duke folur për bllokadat e pikave kufitare, të cilat u organizuan si protestë kundër “pushtimit të objekteve të institucioneve serbe në veri të Kosovës”, Vuletiq beson se kjo lloj proteste nuk është zgjidhje, sepse vetëm krijon presion shtesë dhe ngre tensione.

Ai ka thënë se komuniteti serb në Kosovë ka qenë peng i politikës së Beogradit për vite me radhë.

“Nuk ka guxim në politikën serbe të pranojë se politika e Kosovës po zhvillohet në mënyrë të gabuar, prandaj serbët në Kosovë po i vuajnë pasojat”.

“Përfundimi është se të gjithë serbët e dinë se cili është epilogu për Kosovën, kush e humbi Kosovën, njerëzit që jetojnë atje poshtë e dinë se si jetojnë dhe pengjet e kujt janë. Komuniteti serb në Kosovë është peng i politikës që zbaton edhe qeveria edhe opozita, sepse askush nuk ka guxim të përballet me politikën shkatërruese të Kosovës”, ka thënë Vuletiq.