Ministri i Shëndetësisë në Poloni, Lukasz Szumowski, ka thënë se kufizimet e ndërmarra për frenimin e përhapjes së koronavirusit në këtë vend, do të nisin të lehtësohen nga data 19 prill.

“Gradualisht do të nisim ta aktivizojmë ekonominë”, ka thënë ai për mediat polake.

Zëdhënësi i qeverisë, Piotr Muller, ka thënë se kufizimet në dyqane do të hiqen të parat.

Megjithatë, ai i ka thënë Radios së Polonisë se vendimi do të merret të mërkurën ose të enjten, pasi qeveria t’i analizojë të dhënat nga fundjava e Pashkëve.

Nga e enjtja, do të jetë e detyrueshme për secilin në Poloni që të vendosë maskë ose shall në fytyrë kur del jashtë, ka thënë Mulleri.

Deri të hënën mbrëma, Polonia ka pasur 6 934 raste të të infektuarve me koronavirus, ndërsa 245 pacientë atje kanë humbur jetën.

Të martën, edhe Austria ka nisur lehtësimin e masave të izolimit, duke rihapur mijëra dyqane të vogla.

Lehtësimin e izolimit e ka nisur edhe Spanja, duke i lejuar disa qytetarë të kthehen në punë, ndërsa Danimarka i ka rihapur shkollat për fëmijët e vegjël.

Italia, vendi më i goditur i Evropës, me më shumë se 20,000 viktima nga koronavirusi do t’i lejojë disa firma të rifillojnë operimet nga sot.

Megjithatë, presidenti i Francës, Emmanuel Macron, e ka zgjatur izolimin atje deri më 11 maj.