Sekretari amerikan i Shtetit, Mike Pompeo, ka mbërritur në Arabinë Saudite, derisa Shtetet e Bashkuara të Amerikës (ShBA) synojnë të marrin mbështetje për sanksione të reja kundër Iranit.

Vizita në Riad, e më pas në Jerusalem dhe Aman, vetëm dy ditë pasi Pompeo ka bërë betimin si sekretar Shteti, ndërlidhet me atë se presidenti Trump pritet të vendosë nëse do të tërhiqet apo jo nga marrëveshja bërthamore me Iranin, e nënshkruar në vitin 2015, e që vazhdon të mbështetet nga fuqitë evropiane.

“Irani destabilizon të gjithë rajonin. Ai mbështet milicitë dhe grupet terroriste. Është edhe një tregtar armësh për rebelët Houthi në Jemen, e mbështet po ashtu regjimin vrasës të Assadit në Siri”, ka thënë Pompeo.

Pompeo, në fakt ka garantuar Arabinë Saudite se Shtetet e Bashkuara do të tërhiqen nga marrëveshja e nënshkruar nga paraardhësi i Trumpit, Barack Obama, nëse nuk do të ketë një marrëveshje me partnerët evropianë për ta përmirësuar atë, deri në masën që nuk do të lejojë asnjëherë Republikën Islamike të shtijë në dorë një armë bërthamore, raporton “TCh”.

Donald Trump e ka quajtur atë marrëveshjen më të keqe të nënshkruar ndonjëherë dhe ka kërcënuar se do të rivendosë sanksionet mbi Iranin, nëse marrëveshja nuk do të përmirësohet.

E në fakt, rifillimi i sanksioneve do ta vriste marrëveshjen. Rusia, Kina, Gjermania, Britania e Madhe dhe Franca, që janë palët e tjera nënshkruese, e shohin marrëveshjen si mënyrën më të mirë për të penguar Iranin që të sigurojë armë bërthamore.