Popujt autoktonë në rajonin e Amazonës dhe Brazil, sipas ekspertëve të shëndetit, janë në rrezik të zhduken nga koronavirusi. Sëmundjet e frymëmarrjes – siç janë ato që zhvillohen nga viruset e gripit – janë bërë një shkak kryesor i vdekjes për popujt indigjenë.

Brazili ka raportuar mbi 6 000 raste me COVID 19 dhe 240 vdekje.

Infeksionet fillimisht u përqendruan në zonën industriale Sao Paulo. Sidoqoftë, virusi tani është përhapur në të gjithë vendin, përfshirë territoret indigjenë në luginën e Amazonës. Rasti i parë midis popujve indigjenë u regjistrua në shtetin e Amazonës.

“Ekziston një rrezik i jashtëzakonshëm që virusi të përhapet në masë dhe t’i zhdukë popujt indigjenë”, tha Sofia Mendona, një studiuese në Universitetin Federale të Sao Paulo.

Duke iu përgjigjur pandemisë COVID 19, disa indigjenë planifikuan të ndaheshin në grupe të vogla dhe të kërkonin mbrojtje në pyll. Kjo është mënyra se si ata shmangën zhdukjen gjatë epidemisë së fundit. “Ata do të mbledhin materiale të nevojshme për gjueti dhe peshkim dhe do të vendosen në kampe”, tha Mendona.

Shumë popuj indigjenë nuk kanë mjete për ta zvogëluar rrezikun e transmetimit, siç është larja e duarve me sapun dhe ujë, ose përdorimi i sanitizuesve. Ata, gjithashtu, shpesh jetojnë në afërsi të njëri-tjetrit dhe ndajnë enët dhe gota, që të dyja ndihmojnë në përhapjen e sëmundjeve infektive më shpejt. Tani ata këshillohen që ta ndalojnë ndarjen e pajisjeve dhe t’i praktikojnë praktikat tradicionale të izolimit.

Sipas agjencisë federale Funai, ekzistojnë 107 grupe indigjene të njohura në Amazonën braziliane, të cilat nuk kanë asnjë kontakt me botën e jashtme. Sidoqoftë, prerësit e paligjshëm, gjahtarët dhe misionarët veprojnë në territoret e tyre dhe organizatat indigjene dhe OJQ-të thonë se ka pasur një rritje të mprehtë të sulmeve vitet e fundit.

Qeveria vazhdon ta shkurtojë buxhetin, duke e bërë të vështirë për Funai të mbrojë popujt autoktonë. Tani ekziston frika se beteja kundër koronavirusit do t’i zvogëlojë më tej burimet e saj për të mbrojtur pyllin dhe popujt indigjenë.

Megjithëse disa popuj indigjenë janë dakord se duhet ta shmangin udhëtimin në qytet për ta zvogëluar rrezikun e infeksionit, shumë udhëheqës indigjenë thonë se anëtarët e fisit të tyre kërcënohen nga uria nëse nuk kanë qasje në tregje.

Ndryshe, popujt autoktonë përbëjnë 0.5 % të popullsisë braziliane. Në vitet 1960, një shpërthim i fruthit midis anëtarëve të fisit Yanomami në afërsi të kufirit me Venezuelën shkaktoi vdekjen e shumë prej tyre.