Detyra e fundit e trajnerit italian, Cesare Prandelli daton para një viti teksa ishte në krye të Fiorentinës në Serie A, por tashmë vetë 65-vjeçari thekson se nuk i mungon më profesioni i tij ndërsa shtoi se fakti që po qëndron larg futbollit ia ka zbukuruar jetën.

“Pasioni është gjithnjë i pranishëm, por nuk më mungon detyra e trajnerit dhe besoj se tashmë nuk ka më kthim pas. Fakti që jam larguar nga futbolli dhe po e ndjek në distancë duket se më ka bërë mirë. Nuk ka të bëjë me depresionin, por ndihesha në ankth dhe i vetmuar kjo edhe prej mbylljes së stadiumeve si pasojë e Covid-19. E falënderoj Fiorentinën sepse më mirëkuptoi, tani më duket sikur kam zbuluar kënaqësinë e normalitetit”, ka thënë Prandelli.