Në komunat veriore të Kosovës nuk ka pasur furnizim me produkte serbe përmes rrugëve alternative, kanë thënë zyrtarë të Qeverisë së Kosovës, duke mohuar deklaratat e presidentit të Serbisë, Aleksandër Vuçiq i cili kishte deklaruar se Beogradi ka furnizuar serbët në Kosovë me produkte elementare, të paktën për një muaj.

Ministri i Punëve të Brendshme në Qeverinë e Kosovës, Ekrem Mustafa në një bisedë për “Radion Evropa e Lirë”, ka thënë se nuk ka asnjë indikacion se në pjesën veriore të Mitrovicës kanë hyrë produkte nga shteti i Serbisë.

Dyqanet në pjesën veriore të Kosovës, sipas ministrit Mustafa, janë duke u furnizuar me mallra nga pjesa jugore e Mitrovicës. Ai ka thënë se në dhjetë ditët e fundit, Kosova e ka forcuar kontrollin në rrugët alternative.

“Të gjitha pikat e gjelbra kontrollohen nga Policia e Kosovës në bashkëpunim me KFOR-in. Në dhjetë ditët e fundit në rrugët alternative janë përqendruar më shumë kontrollime. Do të thotë, (deklarata e presidentit të Serbisë Aleksandër Vuçiq,) është një presion i tyre që dëshirojnë ta bëjnë. Edhe në samitin e Ballkanit Perëndimor, të mbajtur në Poloni, ata kanë pohuar se do të shfrytëzojnë rrugët alternative në mënyrë që të denigrojnë vendimin e Qeverisë se Kosovës”, ka thënë Mustafa.

Ndryshe, presidenti i Serbisë, Aleksandër Vuçiq, ka thënë të hënën se ai e ka bërë “një pjesë të mirë të punës”, në furnizimin e serbëve në Kosovë për nevojat themelore, të paktën për muajin e ardhshëm.

“Ia arritëm të sigurojmë një pjesë të mirë, por si e bëmë këtë, nuk do të flas”, ka thënë Vuçiq për Radio Televizionin e Serbisë.

Për dallim nga fillimi i javës së kaluar, kur dyqanet në veri të Kosovës ishin mbyllur dhe pretendonin se nuk kanë produkte elementare, aktualisht atje ka furnizime me produkte, përfshi edhe ato nga Serbia.

Por, zyrtarë të Doganës se Kosovës, pohojnë se ditëve të fundit nuk ka pasur import të theksuar të produkteve serbe, as në mënyrë ligjore dhe as tentim për kontrabandë.

Adriatik Stavileci, zëdhënës në Doganën e Kosovës, ka thënë për “Radion Evropa e Lirë” se gjendja në terren është ndryshe nga deklaratat politike.

Shkrimin e plotë mund ta lexoni në këtë link: https://www.evropaelire.org/a/furnizmi-me-mallra-ne-veri-/30043308.html.