Dje dhe pardje “Nacionale” ka raportuar për Radojica Radomiroviqin, ish-pjesëtar i ushtrisë jugosllave edhe gjatë kohës së luftës së llahtarshme në Kosovë. Sot (e martë) ka raportuar për të birin e tij, Nikollën. Babë e bir del se kanë dy gjëra të përbashkëta – shërbimin në ushtrinë serbe në të kaluarën e tyre dhe shërbimin në të tashmen në institucione të Republikës së Kosovës gjatë qeverisjes së Lëvizjes Vetëvendosje.

I biri i Radoica Radomiroviq, zëvendësministrit për Komunitete dhe Kthim, Nikola Radomiroviq është emëruar nga kryetari i Leposaviqit, Lulzim Hetemi, drejtor në njërën nga drejtoritë komunale. Kështu kishte njoftuar më 4 korrik ministri i Pushtetit Lokal, Elbert Krasniqi.

“Nga sot, Violeta Sakiç, Nikolla Radomiroviq, Nenad Radosavljevic dhe Miroslav Minic do të jenë pjesë e kabinetit të kryetarit Lulzim Hetemi”, pati njoftuar ministër Elbert Krasniqi.

Nikolla Radomiroviq, siç ka kuptuar Nacionale nga burimet e saj, ndryshe (por edhe njëjtë) nga babai i tij, ishte (deri kohëve të fundit para se të bëhej pjesë e kabinitetit të Hetemit) pjesëtar i Ushtrisë së Serbisë, përkatësisht i Brigadës së 4’të ushtrisë tokësore, njësi kjo e vendosur në Kazermën e Rashkës.

Por, kjo nuk i ka penguar Qeverisë e Kosovës, ministrit të Pushtetit Lokal, Elbert Krasniqit, e as kryetarit të Leposaviqit që është i partisë Vetëvendosje, Lulzim Hetemit, që pjesëtari tash i kabinetit të qeverisjes së këtij të fundit, të ketë qenë edhe pjesëtar profesional i ushtrisë serbe, njësiti i të cilit është i vendosur në Kazermën e Rashkës, mu matanë territorit të Republikës së Kosovës, përkatësisht Komunës së Leposaviqit, rreth 20 kilometra distancë.

“Nacionale” ka biseduar me Nikolla Radomorivicin se a është më pjesë e ushtrisë serbe dhe kur e ka lënë ushtrinë. Se ka qenë pjesë e ushtrisë serbe, ai as vet nuk e mohon.

Ai ka thënë se ka qenë pjesë e ushtrisë serbe “deri kur u bëra drejtor” në Komunën e Leposaviqit, e një rresht më poshtë ka thënë se ka “shërbyer në 2021”.

“Nacionale” ia ka shtuar pyetjen “a ke shërbyer deri më 2021, në 2021, apo nga 2021?”, por ai ka thënë “ju dhashë përgjigje të mjaftueshme. Kam përkushtime tjera”.

Biseda me Radomiroviqin:

“Nacionale”: Tani që jeni pjesë e njërës prej drejtorive në Komunën e Leposaviqit të udhëhequr nga Lulzim Hetemi, po ju shkruaj për t’ju pyetur nëse jeni ende pjesë e Ushtrisë serbe (Brigada e 4-të e Armatës, njësi e vendosur në Kazermën e Rashkës).

Radomiroviq: Jo nuk jam në ekip.

“Nacionale”: Kur e keni lënë ushtrinë serbe dhe keni qenë pjesë e ushtrisë serbe deri vonë?

Radomiroviq: Kam shërbyer në ushtri. Para se të bëhesha pjesë e drejtorisë.

“Nacionale”: A mund të na tregoni datën kur e latë ushtrinë? Para sa kohe?

Radomiroviq: Kam shërbyer në 2021. Shpresoj t’ju kam dhënë përgjigje të mjaftueshme. Më falni, kam angazhime të tjera.

“Nacionale”: Pra, ju thoni se keni shërbyer në 2021, nga 2021, apo deri në 2021?

Pas kësaj pyetje të fundit, Nikolla Radomiroviq nuk ka kthyer më përgjigje.