Këshilltari i presidentes, Bekim Kupina, ka reaguar ashpër ndaj ministrit në detyrë të Financave, Hekuran Murati, i cili e kritikoi Presidencën për kërkesën lidhur me tarifat. Kupina theksoi se Presidentja ia ka drejtuar kërkesën Kryeministrit bazuar në rregullat e komunikimit shtetëror dhe respektit ndërinstitucional.

Kupina e quajti deklaratën e Muratit të turpshme dhe skandaloze, duke shtuar se ajo tregon mungesë të njohurive bazike për udhëheqjen e shtetit dhe gatishmërisë për të bashkëpunuar në interes të Kosovës.

“Hiqni tarifat e paarsyeshme ndaj aleatit tonë kryesor dhe lini deklaratat e turpshme dhe fëmijërore,” shkruante Kupina.

Postimi i plotë:

Hekuran Murati është njeriu i fundit në këtë shtet që mund të na flasë për seriozitet. Një njeri që ende nuk e ka kuptuar që udhëheqja e shtetit është punë 24/7, e jo që përfundon në orën 16:00, një njeri që ende nuk e kupton që sipas Kushtetutës dhe komentarit të Kushtetutës, objektivat e politikës së jashtme i përcakton institucioni i Presidencës, që nuk e kupton që këto gjëra nuk janë thjesht veprime ekonomike, por veprime strategjike në raport me aleatin tonë strategjik e ekzistencial, një njeri që mendon se me fyerje e ofendime mund të arrijë diçka në interes të Kosovës, pas një letre institucionale e mirë të studiuar që Presidentja ia ka drejtuar Kryeministrit bazuar në rregullat e komunikimit shtetëror e mirësjelljes e respektit ndërinstitucional. E turpshme, skandaloze, me mungesë të respektit bazik institucional e me mungesë të njohurive bazike se si udhëhiqet shteti e mbi të gjitha me mungesë të gatishmërisë minimale që të punohet e bashkëpunohet në interes të Kosovës është deklarata e tij e sotme. Hiqni tarifat e paarsyeshme ndaj aleatit tonë kryesor, e leni deklaratat e turpshme dhe fëmijërore.