Në Tiranë ka nisur këtë të mërkurë konferenca e 27-të e Shefave të Shtabit të Përgjithshëm të Iniciativës SHBA- Karta e Adriatikut A5.

Fokusi i kësaj konference janë zhvillimet dhe dinamikat në mjedisin e sigurisë në rajon dhe më gjerë, rritja e shpenzimeve të Mbrojtjes mbi pragun 2% e Produktit të Brendshëm Bruto si një mënyrë për të përmbushur objektivat e kapaciteteve të Aleancës.

Presidenti i Shqipërisë, Bajram Begaj, u shpreh se është thelbësore për Kosovën, por edhe stabilitetin e rajonit, që të bëhet pjesë e kartës së Adriatikut dhe NATO-s, shkruan A2 CNN.

“Kjo konferencë është mbledhur në një moment shumë delikat në sigurinë botërore. Për Shqipërinë, anëtarësimi në NATO përbën një dëshmi të përkatësisë sonë në komunitetin Euroatlantik. Kjo nuk është thjesht për më shumë siguri, por edhe angazhim në këtë traktat. FA, gjatë këtyre viteve, kanë kontribuar në operacionet e NATO-s dhe do të vazhdojnë ta bëjnë këtë. Rajoni ynë mbetet i brishtë ndaj ndikimeve të brendshme dhe të jashtme, të cilat mund të destabilizojnë paqen dhe stabilitetin e arritur. Historia nuk duhet harruar, ndryshe rrezikojmë të përsërisim gabimet. Besoj se përmes përpjekjeve të përbashkëta, ne jemi në gjendje të përballemi me këto sfida. Shqiptarët e rajonit janë një faktor konstruktiv dhe i moderuar, duke kontribuar në paqe, siguri dhe stabilitet. Në këtë rrugëtim është me rëndësi që të përfshihen edhe anëtarë të rinj, që dëshirojnë të anëtarësohen në iniciativën SHBA-Karta e Adriatikut dhe në NATO. Anëtarësimi i Kosovë në këtë kartë është thelbësor jo vetëm për Kosovën, por edhe stabilitetin e rajonit”, u shpreh Begaj.